Nongpoh, Risaw 22: Kum ka jingshim khia ban tur sha ki shnong bad ki skul bapher bapher hapoh ka Konstituensi, U Bah Mayral Born Syiem, MLA ka Nongpoh hynin ka sngi u la leit ban mih sha ka shnong Kharpati, Ribhoi District ban ia kynduh iaki Nonghikai bad ki khynnah Skul jong ka Raid Hoppati Christian Secondary School.
Ha kane ka prokram ban ia kynduh bad ki Nongpyniaid skul u MLA ka Nongpoh u la ioh ruh ban aiti syndon iaka Work Order kaba 2 lakh tynka kaba la pynmang lyngba ka SRWP MLA Skim na ka bynta ban pyndep iaki jingtei kynroh jong katei ka skul hakaba la ioh ban pdiang ia katei ka Work Order da u Principal ka Skul u bah Nirmal Terang ha ka jingiadon ryngkat lang ki Nonghikai lem bad ki kmie ki kpa jong ki khynnah Skul.
Haba kren ha katei ka sngi, U bah Mayral Born Syiem, u la ioh ban ialap ha ka jing donkam ba kum ki khynnah skul ki dei ban don iaka jingtip kaba bniah halor ka National Education Policy bad kumjuh iaka CUET Exam khnang ba kin long kiba pynkhreh ynda ki la pass na skul bad don jingthmu ban bteng iaki jingpule shakhmat.
U Bah Mayral Born u la tyrwa ruh ia u Principal bad iaki Nonghikai Skul ba lada ki khynnah skul ki donkam ban ioh jingtip shuh shuh halor ka NEP bad ka CUET naka liang jong u kum u Nongmihkhmat un sa pynlong iaka Program kaba kyrpang hakaba yn sa wan daki riew shemphang ban batai bniah halor kitei ki bynta.
U bah Mayral Born Syiem, u la kyntu ruh iaki khynnah skul ba ki dei ban long kiba smat bad kiba kloi ban pdiang ki jingnang jingtip khnang ba kin lah ban ialeh iaki exam bapher bapher ha ka lynti iaid jong ki kum ki khynnah skul. Hakaba u la ong ruh ba ha kane ka pyrthei ia khun ban wat kam wat jam ka long shisha kaba jwat namar ba tang kito kiba trei shitom bad ki ba don shisha iaki jingnang jingtip kin ioh ia ka kam.
