Nongpoh, Risaw 22: Ka Ophis treikam ka Tyrso Valley Wildlife Protection Society lyngba u Chairman jong ka u Bah Rojen Sten, uba long ruh u Sardar ka Shnat Raid Tyrso ha ka jingdon ryngkat lem u Secretary bad ki Dkhot mynta ka sngi ki la pyntp ba ki la pdiang sngewbha ia ka jingwan poi ki sim Amur Falcon kiba ju wan poi shisien shisnem ha ka thain Tyrso bad khamtam ha ka Shnong Umru, Ri Bhoi District.
Kum ban pynkynmaw, kine ki sim Amur Falcon ki dei kynhun sim kbeit kiba ju wan poi na ka Siberia, South Africa ban shongthain shipor ha katei ka shnong bad ki ju wan poi beit shiteng bnai jong u bnai Risaw haduh u bnai Naiwieng bad kin sa leit phai biang.
Haba kren sha ki lad pathai khubor, u Bah Rojen Sten kum u Chaiman ka Tyrso Valley Wildlife Protection Society, u la ong ba kane ka Society ka khot ka wer ia ki paid nongshnong jong ka Jylla Meghalaya hi baroh kawei kumjuh ruh ia baroh ki nongwan jongoh kai kiba wan na kiwei pat ki jaka ban wan ban sakhi ne peit ia kitei ki kynhun sim ki ban sa poi da ki lak tylli.
Shuh shuh u Bah Rojen Sten u la pynshai ruh ba ka por ban khmih ia kitei ki sim ka long ha ka por 4 baje janmiet bad 4 baje mynstep. Kumjuh ruh na ka bynta jong ka 8th Amur Falcon Festival ka Tyrso Valley Wildlife Protection Society ka la shaniah bad aiti ban pyniaid sha ka Eastern RiBhoi Tourism And Environment Development (ERTED).
