Nongpoh, Iaïong 15: Uwei u Hati khlaw u la thiah iap lyngrang bad la lap mynta ka sngi ha kawei ka khlaw ha 14mer, ba hap ha ka thain Byrnihat bad la suba ba une u hati u la iap na ka jingshah bat ha u sainar ka bording ilektrik.
Ha ka jingialam u Rage Forest Officer na ka tnad Wildlife, u Bah Leening Wahlang ki la hiar ban leit jurip sha katei ka khlaw bad la lap shisha ba utei u Hati khlaw u la iap ha katei ka khlaw. Na ka liang kine ki ophisar na ka tnad Wildlife ki la pynlong ia ka jingtohkit halor kane ka jingiap u Hati bad ha ka jingtohkit la suba jur ba une u Hati u la iap na ka daw ka jingshah bat ha u sainar bording ilektrik.
Kumba la sakhi, ka jingdon kine ki sainar bording ilektrik lada ym leh ha kata ka rukom kaba thikna ka buh jingma ym tang ia ki mrad khlaw bad ka buh jingma ruh ia ki paidbah, kiba leit ba wan sha ki khlaw ki btap na ka bynta ka jingdonkam bapher bapher. Kitei ki ophisar ki la tohkit halor kane ka jingiap u hati bad ki dang ap ia ka hukum la kin tep ne kin thang.
