Nongpoh, Iaïong 15: Ban rad dyngkhong ia ki kam sniew ha ka surokbah National Highway -6 ha Ri Bhoi bad ban tehlakam ia ka jingdih kyiad bad pynher sted ia ki Kali paidbah, ba la ju wan rah ki jingjia ba sngewsih, ka tnad Police na Ri Bhoi ha ka jingialam u Senior Superintendent of Police u V.S Rathore ki la pynlong ia ka jingkhynra naphang ia ki Kali paidbah ha ka miet jong ka sngi Baar ha kaba bun ki Kali ba pynkheiñ aiñ ki la shah bat bad shah pynhap katkum ki kyndon jong ka aiñ.
Kum ban pynkynmaw, tang ha ki bnai ba la leit noh bun ki jingjia ba sngewsih ki ka la jia bad haduh 20 ngut ki mynsiem ba kordor kiba la duh ia la ka jingim, kaba dei tang na ka daw ka jingpynher sted ia ki Kali bad ka jingdih kyiad u dirbar uba niah ïa ia ki Kali ha kane ka surokbah kaba don ha Ri Bhoi District.
Haba kren sha ki lad pathai khubor, u Senior Superintendent of Police ka Ri Bhoi u V.S Rathore u la ong ba kane ka jingkhynran ne bat ia ki kali paidbah la ju pynlong man ka por bad mynta ka meit ruh la pynlong ia kane ka jingkhynra ia ki Kali, ka dei halor ka nongrim ban tehlakam ia ki kali ba pynher sted, kiba dih kyiad u dribar bad kiba pynkhein ia ka aiñ.
U la ong ruh ym tang katta, kane ka jingtalasi ne khynra ia ki Kali ka long ban tehlakam ia ki kam tuh kali khamtam ki kali ar shaka, ka jingtehlakam ia kiba shalan tuh ia u drok bad ruh ban tehalakam na ka jingwan rung tuh beaiñ ki Nong Bangladesh, ha kaba la sakhi kumba la mih ha ki lad pathai khubor ba la ioh ban kem ia kita ki Nong Bangladesh kiba wan rung beaiñ sha ka jylla.
“Ka tnad Pulit na Ri Bhoi kan nym shong thaid bad kan bteng ban pyrkhing ia ki kali paidbah kiba pynkheiñ aiñ bad kiba leh ia ki kam sniew bad dei tang lada ngi pyrkhing kumne ngi lah ban ioh bat ia kiba leh kam sniew bad kiba pynkheiñ aiñ” ong u V.S Rathore, u heh pulit ka Ri Bhoi.
Shuh shuh, u la bynrap ruh ba ka tnad Pulit kan ia khun pyrshah ban pynduhjaid ia ki kam sniew ha Ri Bhoi, kiba pynkheiñ aiñ niah Kali bad kiwei kiwei ki kam sniew bad nangne shakhmat ka tnad Pulit kan pynkhlain ruh ia ki VDP ha man la ki shnong na ka bynta ban ia trei lang bad da ka jingiatrei lang ngi lah ban pynduhjaid ia kiba bun ki kam sniew khamtam ka jingleh bor ia ki kynthei ki khynnah, u la bynrap.
