Nongpoh, Jylliew 16: Uwei u Dribar bad ki 5 ngut kiba shong ha ka Kali Alto 800 ki la mynsaw, kaba dei hadien ba katei ka Kali kaba ki shong ka la shah ban tynrah kynsan ha kawei ka Trok, kaba la jia mynta ka step ha ka por 5.30 baje mynstep ha Khapmara ba hap ha ka Surok Shillong By-pass ha Ri Bhoi.
Katei ka Kali Alto 800 ka don ia u number AAS 01AY 5489 ba la niah da u Rodina Janong (26) na ka shnong Qualapaty Shillong bad katei ka trok na la wan tynrah ia kane ka Kali Alto 800 pat ka dei kaba don ia u number NL 01 AE 5956 ba u Dribar u la phet krat noh ia lade hadien ba la leit ban tynrah ia katei ka Kali Alto 800.
Nalor u Dirbar katei ka Kali Alto 800, u Rodina Janong, kiwei kiba la ia don lang bad kiba la mynsaw ki kynthup ia u Jermi O Shullai (27) na Wahtabru, u Eric Mawlieh (25) na Qualapaty, u Edmund Nonghulu (28) na Lumdiengjri, u Francis Pde (28) na Lama Villa bad u Tremiki Suting (26) na Qualapaty Shilong.
Kumba la pyntip da ki bor pulit ka Ri Bhoi, ia kitei kiba la mynsaw la rah noh sha CHC Bhoirymbong ban ioh ia ka jingsumar bad tang hadien ba la ioh jingsumar la pynlait noh da ki Doctor na ka daw kaba ki la shu mynsaw malu mala bad wat la katta ruh u doctor u la pyntip ba baroh ki dei kiba la dep ban dih kyiad kumba la paw hadien ba la pyndep ia ka examination na ki Doctor.
La ong ruh ba katei ka Kali Alto 800 ka dei kaba wan Shillong ban hiar sha Sumer bad katei ka Trok ruh kaba thmu ba hiar sha Guwhati, hynrei kynsan kynsan katei ka trok ka la leit ban tynrah haduh ba ki bynta ba shakhamt ka Kali Alto 800 ka la julor bad u Dribar ka Trok pat u la ioh lad ban phet krat ia lade.
Halor kane ka jingjia, ki bor pulit ka Ri Bhoi ki dang pynlong ia ka jingtohkit ban thwet ia utei u dribar ba la phet krat bad ha kajuh ka por ban tohkit bniah khnang ban tip ia ka daw tynrai jong kane ka jingjia, ong ka tyllong khubor na ki Pulit ka Ri Bhoi.
MYNSAW U DRIBAR BAD 5 NGUT, PHET KRAD U DRIBAR TROK HADIEN BA TYNRAH IA KA KALI ALTO 800 HA RI BHOI
