Nongpoh, Jymmang 19: Ha kawei na ka jingjia ia tyngkhuh kali, kawei ka Trok kaba don ia u number WB-H-9477 ka la leit tynrah kynsan ia kawei ka Trok kaba don ia u number AS-25-1455 katba ka ieng harud surok bad ha kane ka jingshah tynrah katei ka Trok kaba ieng harud surofk ka la kylla noh ha surok
Kane ka jingjia ka lajia ha ka por 10 ba mynmiet ha ka miet jong ka sngi Saitjain ha 15mer ba hap ha ka surokbah National Highway-6 ha Ri Bhoi District.
Kumba la ioh lum jingtip na ki Pulit ka Ri Bhoi, la ong ba katei ka trok kaba la leit ban tynrah ia katei ka Trok ba ieng harud surok ka dang hiar na 16-mile ban leit sha Guwhati, hynrei ha ka jingbym lah tehlakam u Dribar, ka la leit ban tynrah ia katei pat ka Trok ba ieng harud surok haduh ba ka la julor bad katei ka Trok ba shah tynrah ka la kylla ha surok.
La ong ruh ba u Dribar jong katei ka Trok ba leit tynrah ia katei ka Trok ba ieng, u la phet krad noh ia lade na katei ka jingjia bad u dribar katei ka Trok ba shah tynrah pat u la sahkut hapoh katei ka Trok ha kaba hadien katto katne por da ka jingiarap ki bor pulit la lah ban sei noh ia u shabar.
Ki Pulit ki iathuh ruh hadien ba la sei ia u Dribar la rah noh sha PHC Byrnihat ban shah sumar halor ka jingmynsaw jongu, bad na ka liang ki pulit ruh ki dang pynlong ia ka jingtohkit halor kane ka jingjia kiba dei katkum ki kyndon jong ka aiñ.
