Shillong, Naiwieng 18: Da ka jingsngewkhia kaba jur halor ki jingjia iakynad kaba nang thnem bha hapoh ka jylla Manipur, ha kaba ka jingiap ki briew ka jingmynsaw bad ka jingshah thang ki iing ki sem ka lang jur nang jur, hadien ba la sakhi ba ka sorkar ba la lamkhmat da u Biren Singh kum u Myntri Rangbah, ka la pheil ban tehlakam, na ka liang ka seng sain pyrthei ka National People’s Party (NPP) ba lamkhmat da u Conrad K Sangma, ka la rai ban weng noh ban kyrshan ia katei ka sorkar ha Manipur.
Haba kren bad ki Nongthoh Khubor, u Conrad K Sangma, u ba dei u National President ka NPP bad ruh u Myntri Rangbah ka jylla Meghalaya, u la ong ba ka NPP ka la duh ia ka jingshaniah ia ka sorkar ba la lamkhmat da u Biren Singh hadien ba la sakhi ba kane ka sorkar kam shem la lah ban tehlakam ne pynmih kano kano ka rai ban weng bad ban pynkut noh ia ka jingiakynad ha ka jylla Manipur kaba la nang jur nang jur na kawei ka sngi sha kawei pat.
U la ong ruh, ba dang ha kine ki khyndiat sngi, la sakhi ia ka jingbteng ka jingiakynad bad ka jingmih ki paidbah ban thang ia ki iing jong ki Myntri ka sorkar Manipur bad ruh jong ki MLA, ki jingiap jong ki briew bad ka jingduh noh ia ki jingdon jingem ha katei ka jylla ka la long kaba ym sngew lah ban pdiang bad kum ka party NPP kaba don 7 ngut ki MLA ha Manipur ka da angnud dikdik ba ka shongsuk shongshngaiñ kan wanphai biang hapoh kane ka jylla.
Lah ban kdew, ba ki jingjia iakynad ka la jur bha ha Manipur khamtam ha Imphal Valley kaba la jia hadien ka jinglap ia ki 3 tylli ki metiap jong ki kynthei, ki khynnah hapoh ka Jiribam District hapoh Manipur.
Kumba long mynta ka BJP kaba lamkhmat ia ka sorkar jylla hapoh Manipur hapoh u Biren Singh kum u Myntri Rangbah kane ka party ka don kumba 37 ngut ki MLA ban lamkhmat hi ia ka sorkar bad ka jingkyrshan ruh na ki katto katne ki seng sain pyrthei bad ki MLA shimet.
