Nongpoh, Iaiong 19: Ka Kur Syiem jong ka Raid Nongtluh mynta ka sngi ka la plie paidbah ïa u mot sahnam u Chak Syiem, u Syiem uba la synshar bad long ruh u khlawait jong ka Raid Nongtluh ha u snem 1858. Ia utei u mot sahnam la tei ha phyllaw jong ka ophis u Syiem ka Raid Nongtluh kaba don ha ïew Umden, da ka Dorbar Kur Syiem ka Raid Nongtluh.
Ha kane ka jingplie paidbah, u Bah Mayral Born Syiem, MLA ka Nongpoh, u la long u kongsan ha ryngkat ka jingdonlang u Pa’iem Vincent Eng Syiem, uba long u Syiem ka Raid Nongtluh, ki longsan mansan jong ka Kur Syiem, ki longkmie longkpa, bad ki samla jong ka Kur Syiem.
Kum ban shu pynpaw, u Chak Syiem u dei u khun jong ka Ngap, bad u la shimti ban synshar ïa ka Raid Nongtluh tang hapoh shi snem, naduh 1858 haduh 1859. U la long ruh u Syiem ba 4 jong ka Raid, bad la ithuh ïa u kum u khlawait ba khraw hadien ba ka Raid Nongtluh kala jop ïa ka thma pyrshah ïa ki khlawait bad ki paid ïapom Thaiang kiba la wan hiar thma ha kito ki snem.
Ha kajuh ka sngi, ka Kur Syiem ka la ai burom ruh ïa ki samla jong ka kur kiba la wanrah jingithuh bad burom lyngba ka pule puthi, ka kam ïalehkai sports, bad kiwei kiwei ki bynta ha ka imlang sahlang.
