Nongpoh, Rymphang 03: U Bah Sosthenes Sohtun myntri ka tnad C&RD ka jylla mynta ka sngi u la plie paidbah ïaka Sampoornata Abhiyan 2.0 ha Ri-Bhoi District ban kyntiew bad pynsted ïaka roi ka par ha Ri-Bhoi District kaba dei ruh ka Aspirational District haka jylla.

Ïa kane ka jingïalang plie paidbah la pynlong ha Parish Hall Nongpoh bad ha kane ka sngi la don ryngkat ruh da u Bah Mayral Born Syiem MLA ka Nongpoh, u Abhilash Baranwal Deputy Commissioner ka Ri-Bhoi, ki ophisar naki tnad sorkar bapher bapher.

Haba kren ha kane ka sngi naka liang u Bah Sosthenes Sohtun kum u myntri sorkar ba dei peit ïaki kam pynroi sha ki nongkyndong u la ong ba kane ka Sampoornata Abhiyan 2.0 ka don ïaka thong ba ki kam pynroi kin poi shaduh ki jaka nongkyndong ha kane ka Aspirational District ryngkat ka jingkyntu ruh ïaki tnad sorkar bapher bapher ba kin ai ka jingïatreilang naka bynta ki kam pynroi kiba la ithuh hapoh ka Aspirational District Framework khamtam ki tnad ba kongsan kum ka koit ka khiah, ka pule ka puthi, ka rep ka riang, ka jingkyntiew ïaki sap jong ki khun samla bad kiwei kiwei.

Naka liang u MLA ka Nongpoh u Bah Mayral Born Syiem u la khot la wer ïaki baroh ki tnad naduh ki heh ophisar, ki nongtrei ba shakhmat ba kin don ka jingïatreilang naka bynta ban kyntiew ïaka dong ka thaiñ Ri-Bhoi ba kane ka prokram kan long kaba jop bad seisoh kumba la thmu.

Ka jingplie paidbah ïa ka Sampoornata Abhiyan 2.0 ha Ri Bhoi ka pyni ïa ka jingangnud jong ka sorkar ban pyndap ïa ki jingduna ha ka roi ka par ha kylleng ki shnong haka dong Ri-Bhoi kaba la iohnam ruh kum ka Aspirational District.