Nongpoh, Rymphang 3: Ka Ri Bhoi District Congress Committee (RBDCC) mynta ka sngi ka la bteng ïa ka jingïakhih kaba jai jai (Peaceful Sit-In Protest) hakhmat ka Indoor Stadium, kaba don marjan bad ka ophis u Deputy Commissioner ka Ri-Bhoi District, ban pynpaw ïa ka jingpyrshah ïa ka jingpynkylla jong ka Sorkar BJP ïa ka skim MGNREGA sha ka Viksit Bharat – Guarantee for Rozgar and Ajeevika Mission (Gramin), kaba la tip paidbah kum ka VB-G RAM G Act, 2025.

Ka jingïakhih ka la long hapoh ka jingïalam u President ka RBDCC, u Bah Rocky Marweiñ, ryngkat bad ki dkhot ka party na Ri-Bhoi District bad na Jirang Block. Kine ki nongïalam bad ki dkhot ki la pynpaw ïa ka jingpyrshah da kaba rah ïa ki placard, kiba dawa ban pynneh ïa ka skim MGNREGA kaba u paidbah u ju tip kum ka “skim 100 sngi”, bad ban pynrem ïa ka aiñ thymmai jong ka Sorkar BJP.

Kum ban shu kdew, hashwa kane, ka RBDCC ka la pynlong ïa kajuh ka jingïakhih kaba jai jai ha Ïew Byrnihat, ban pyrshah ïa ka jingwanrah jong ka Sorkar BJP ïa kane ka aiñ kaba pynkylla ïa ka skim MGNREGA sha ka VB-G RAM G.

Ha kane ka jingïakhih, ka RBDCC ka la pynpaw ba ka ïeng skhem ha la ka nongrim ban ïada ïa ka skim MGNREGA, kaba long ka jingïarap kaba kongsan ïa ki paidbah nongkyndong, khamtam ïa ki longïing kiba duna jingïoh kam jingïoh jam. Ka Ribhoi District Congress Committee ka dawa ruh na ka Sorkar Pdeng ban weng noh ïa kane ka jingpynkylla thymmai bad ban pynneh ïa ka skim MGNREGA ha ka dur bad ka rukom kaba la ju treikam mynshwa, na ka bynta ka bha ka miat jong ki paidbah.

Hadien katei ka jingiakhih kaba jai jai (Peaceful Sit-In Protest) Naka liang ka Ribhoi District Congress Committee hapoh ka jingialam u Bah Rocky Marweiñ kum u President ki la leit ban kynduh ïa u Deputy Commissioner ka Ribhoi u Abhilash Baranwal IAS, ban buh syndon daka jingthoh hakaba ia dei bad katei ka jingpyrshah jong ki.