Ban kitbok kitrwiang na bynta ka bit ka biang jong ki nongialam shnong, ka Dorbar Shnong Saiden ha ka 2 tarik u Risaw ka la ioh ban pynkup ia ka spong ka phali ia u Rangbah Shnong bad ruh ia u Secretary Shnong da u Myntri ka Hima 12 Lyngdoh jong ka Elaka Nongpoh Sirdarship.
Kumba la sakhi ha ka prokram pynspong ia spong ka phali, u Myntri Stoiñ Syngkli, u la pynspong ia u Bah EK Lapang kum u Rangbah Shnong bad u Myntri H Namsaw u la pynspong ia u Bah Evansis Jones Myrthong kum u Secretary ka Dorbar Shnong Saiden nalor ka jingpynithuh ruh ia baroh ki dkhot ka Executive Committee ka Dorbar Shnong Saiden, ia ka prokram la pyniaid da u Bah Laitping Makri, Assistant Rangbah Shnong ka Saiden.
Ka Dorbar Shnong Saiden ka la ioh ruh, ban ai burom ia u samla Donkupar Kharlukhi, u wei napdeng ki samla shnong u ba la pyndep ia ka jingpule Pastor.
Haba kren ha kane ka prokram, u Bah Stoiñ Syngkli, u la ai ka jingkitbok kitrwiang kaba skhem ia baroh arngut ki nongialam shnong kumjuh ia ki dkhot ka EC ba kin nang lah ban pyntyllun ia ki kam pyniaid shnong bad ruh ban kyntiew ia ka shnong ka thaw, ban peit ruh ia ka bha ka miat bad ka roi ka par.
U la pynkynmaw ruh, ba ki Rangbah Shnong bad Secretary Shnong ki dei ki nongialam shnong ba la ithuh kyrpang da ka Khasi Hills Autonomous District Council lyngba ka kyndon aiñ bad kane ka kam ka long kaba kyntang ym ka kam ialehkai khunjakai namar kum ki nongialam shnong ki don ia ka jingkitkhlieh kaba khia ban ialam bad ban peit ia ka shnong ka thaw ha kiba bun ki liang.
Ha kane kajuh ka sngi, ka Dorbar Shnong Saiden ka la ioh ban shimbynta ha ka jingrakhe ia ka Gandhi Jayanti da kaba pynlong ia ka jingpynkhuid shnong ba la ia shimbynta da baroh ki nongshong shnong ban wanrah ia ka khuid ka suba ha ki sawdong sawkun baroh.
