Kum shi bynta ban kynmaw burom ka sngi kha u kpa ka jaid bynriew u Mahatma Gandhi, kaba dei ka jingdap 155 snem ba la khah ia u, ka Shnong Umsawnongkharai mynta ka sngi ka la rakhe ia kane ka sngi kyrpang da kaba pynlong ia ka jingpynkhuid shnong pynkhuid thaw ba ka bynta ban wan rah ia ka khuid ka suba hapoh ka shnong hi baroh kawei.
Ia kane ka jingpynkhuid shnong la ialam da u Rangbah Shnong u Bah Angelus Sun bad u Secretary u Bah Jony Shylla bad la shim bynta lang ruh naduh ki samla, ki longkmie longkpa bad ki paidbah nongshong shnong hi baroh kawei.
Hadien ka jingpynkhuid shnong la pynlong ruh ia ka jingbam sngewbha jong baroh ki paidbah nongshnong shnong bad ruh la sam khusnam ruh sha ki samla ba pas bha ha ka SSLC bad HSSLC examination 2024, kiba dei ki samla pule na katei ka shnong, ha kaba la pynlong ia kane ka jingai khusnam da ka Understanding of Lifelong Learning for All in Society ( ULLAS), kaba dei katkum ka thong ka New India Literacy Programme, bad kaba dei ruh ka thong ban kyntiew na ka bynta ban nang ban thoh ban pule ia kito ki bym shym la ioh lad ban pyndep ia ki jingpule.
