Nongpoh, Nohprah 23: Shwa ban jam sha ka jinglehkmen Christmas bad snem thymmai ba kum ka seng ka angnud ban ioh pdiang ia bun ki jingkyrkhu, ka HNYF Women’s Wing mynta ka sngi ka la bteng ban sam ia ki jain syaid sha ki Longing baduk ha ka thain Sohkwhai ha Ri Bhoi District.
Ia kane ka jingsam ia ki khusnam la pynlong ha ka Shnong Umden-la-ang ha ka thain Sohkwai ha kaba la don lang naduh ka General Secretary ka HNYF Women’s Wing ka Kong Phrinsibon Kharmuti, u President ka HNYF Northern Region u Bah Hesting Lyngdoh, ka President ka HNYF Women’s Wing Sohkhwai Circle ka Kong Wanrihunlang Namsaw, u Secretary Shnong u Bah Amstrong Nongrum bad kynthup kiwei ki nongialam bad kitei ki longing baduk.
Ka seng ha kane ka sngi ka la sam da ki jain syaid (Blanket) sha ki 30 tylli ki longing na ki lai tylli ki shnong ba hap ha ka thain Sohkhwai. Kane ka jingsam ia kitei ki jain syaid ka la long shisha ka jingken ia kitei kiba bun ki longing baduk.
Haba kren ha kane ka sngi, naduh ka general secretary ka HNYF Women’s Wing ka Kong Phrinsibon Kharmuti bad ruh u President ka HNYF Northern Region u Bah Hesting Lyngdoh, ki la pynpaw ia ka mynsiem jong ka jingkmen ba ki la ioh ban lehkmen Christmas bad snem thymmai bad kitei ki longing baduk bad ki la pynpaw ruh kawei na ka thong jong ka seng ka long ban peit kyrpang ia ki longing longsem ha ki shnong ki thaw kiba mat ia shibun ki jingeh na ka daw ka jingban ka duk ka kyrduh.
Ki la ong ruh ba kane ka jingai sngewbha ka long tang ka dak ban ialehkmen bad kitei ki longing baduk bad ki kyrpad ruh ia ki, ba kin pdiang da ka mynsiem jong ka jingkmen wat la ka dei tang kata ka jingai barit ba ka seng ka angnud ban phaikhmat tang sha kito ki longing kiba donkam shisha ia ka jingiarap na ka seng.
Shuh shuh, ki la ong ruh ka seng dang bteng ia ka jingshakri ha ki sngi bad ki por ban sa wan bad kum ka seng ka dang don ruh shibun ki thong ba ka hap ban shakri sha man la ki shnong ki thaw bad khamtam ban peit kyrpang ia ka jingeh jong ki paidbah ha baroh ki bynta jong ka jylla, ki la bynrap.
