Nongpoh, Ïaiong 03: Ka jingrakhe lehkmen kaba lai sngi jong ki paid karbi ïaka jingdap 50 snem ka seng All Meghalaya Karbi Association (AMKA) ne ka jingrakhe ia kata ka jubili ksiar ka la poi noh mynta ka sngi sha kaba kut da ki prokram bapher bapher kiba la pynlong hapoh kine ki lai sngi. Haba pynkut noh ia kane ka jubili ksiar la wan ban sakhi da u Myntri rangbah ka jylla u Conrad Sangma kum u kongsan haka jingiadonlang u MLA ka Nongpoh bah Mayralborn Syiem kum u symbud kongsan, bad kynthup u MLA ka Mawhati bah Charles Marngar, Bah Isynei Hinge EM ka KHADC, Kong Rona Khymdeit MDC Nongpoh, u Avijit Kro, Deputy Chairman ka KAAC, U Robert Jones Ronghang President ka AMKA lem bad kiwei kiwei ki Nongïalam ka AMKA.
Kum ban pynsah jingkynmaw ïa kane ka sngi rakhe ïaka Jubilee Ksiar, Ha kane ka sngi, ki Nongïalam ka AMKA ki la buh da u Maw tablet ban sah nam ha kaba la ïoh pat ban plie da u Mytri Rangbah ka jylla.
Haba rakhe ia kane ka jubili ksiar ka long ruh ka sngi sah jingkynmaw, ha kaba u mytri rangbah ka jylla u Conrad K. Sangma u la pynbna ia ka song pisa kaba T. 55 lak ban iarap ia ka AMKA ba kynthup T. 5 lak na ka bynta ka jingrakhe ia kane ka jubili ksiar bad 50 lak na ka bynta ban shna ia ka Cultural Centre ka AMKA.
Na ka liang u MLA MLA ka Nongpoh u bah Mayralborn Syiem, ha kane ka sngi u la aiti ïaka workorder kaba 5 lakh tyngka lyngba ka Chief Minister Special Development Fund CMSDF sha ki Nongïalam ka AMKA naka bynta ban tei pynbha ïaka Auditorium Hall ka AMKA kaba don ha Umwang.
U Myntri rangbah ka jylla, u Conrad K. Sangma, nalor ka song jingiarap kaba u la pynbna ban iarap ia ka AMKA na ka bynta ban tei ia ka Cultural Centre bad ruh ka jingiarap na ka bynta kane ka jingrakhe ia ka Jubili Ksiar, u la iaroh ruh ia ka AMKA kum kawei na ka kynhun kaba shakri na ka bynta ka bha ka miat ki paid Karbi bad ruh ha ka jylla hi baroh kawei.
U la iaroh ruh ia ka jinglah ban pynneh pynsah ia ki riti ki dustur, ha kaba kano kano ka jaid byrniew khlem ka riti ka dustur ka dei ka jaid bynriew kaba iap bad u la kyntu ruh ia ka AMKA ba kan dang bteng ka jingshakri na ka bynta ki paid Karbi bad ki paid ka jylla Meghalaya hi baroh kawei ba ka jingshakri ka dei ban long kaba ai jingmyntoi ha ka imlang ka sahlang hi baroh kawei.
