Nongpoh, Nohprah 08: Ka Umsning Block Congress Committee ha ka jingialang kaba la long ha ka sngi Saitjain ha Umsning Auditorium Hall ka la pynbna ia ka kyrteng jong u kyrtong ba ia khun ha ka election MDC 2025 na Usmning Constituency ba la pynkhamti ia u Bah Rocky A. Marwein kum u kyrtong ba pura ban ia aireng ha katei ka election MDC ban mihkhmat ia ka Umsning Constituency sha ka ing dorbar thaw ain ha KHADC.
U Bah S. W Rymbai kum u District Observer ka party Congress, u la shim ia ka bynta ban pynbna ia kyrteng jong u kyrtong bad ruh ryngkat ka jingkyrkhu kyrdoh ia u Bah Rocky A. Marwein uba la long u kyrtong ba pura ban ia aireng ha kane ka election MDC 2025 na Umsning Constituency.
Ha kane ka sngi, la sakhi ruh da ka jingdon lang u president ka Ri Bhoi District Congress Committee (RBDCC, u Bah M.G Kharshanlor ryngkat kiwei ki nongialam bad da ki hajar ngut ki nongkyrshan, kiba la rai ban kyrshan radbah na ka bynta ka jingjop ba don burom u Bah Rocky A. Marwein kum u kyrtong ka Congress na Umsning Constituency.
Haba kren ha kane ka sngi, naduh u Bah Rocky A. Marwein kum u kyrtong, u Bah S.W Rymbai lem bad kiwei ki nongialam ki la shim ia ka rai ban trei shitrhem na ka bynta ban pynjop ia u kyrtong bad ki la pan ruh ka jingkyrshan ba radbah ki paidbah ka Umsning Constituency khnang ba ka party congress kan dang lah ban ai ka jingshakri kaba bha tam na ka bynta ki paidbah ka Constituency, ka District bad ka jylla hi baroh kawei.
