Nongpoh, Lber 26: Mynta ka sngi ha ka por 7.30 janmeit, ki nongshong shnong ka Mawpdeng, kaba dei ka shnong ba don ha khappud Assam-Meghalaya ba hap ha Umsiang Police Outpost, Ri Bhoi District ki la ioh ban bat ia 2 ngut ki rangbah bad la ioh ruh ban kurup 2 tylli ki suloi (Country Made) bad ka doh Hati ba la tyrkhong.
Kitei ki ar ngut ki rangbah ba la shah kem la tip kyrteng kum u Qurenius Muktieh, (27) na ka shnong Korhadem bad u Jethril Umbah, (32) na ka shnong Pamlatar ba hap ha ka Umsohlait Police Station ha Ri Bhoi District.
Ka khubor ba la ioh lum na ki Pulit ka Ri Bhoi, la ong ba ia kitei ki ar ngut la kem bad la phah ia ka medical examination. Ia kitei ki suloi bad kiwei ki tiar ryngkat ka doh hati ba la tyrkhong la kurup noh da ki Pulit ban phah na ka bynta ka FSL examination.
Halor ka jingioh kem ia kine ki ar ngut, la ong ruh ba ki ki ophisar ka Sonapur Range hapoh Kamrup East Division, Basistha, Guwahati, ki la pyntip ba 2 tylli ki Hati la shah pyniap katkum ba la ioh lum jingtip ha u bnai Naiwieng 2024, ha kaba la buh jingthoh halor kane ka jingiap Ki hati ha ka 16 tarik u Naiweing 2024 bad la lap biang ia ka met iap u Hati ha ka 18 tarik u Lber 2025 ha kaba la suba ba kine ki 2 ngut ki rangbah ki la don kti ha kaba siat pyniap ia kitei ki Hati.
Shuh shuh, la ong halor kane ka jingioh kem ia kitei ki 2 ngut la dep ban register case ha Khanapara Polcie Station katkum ka Case No 09(03)2025 u/s 325/61(2)/3(5) BNS RW Sec 25(1)/27(1) Arms Act bad ka jingtohkit halor kane ka jingioh kem ia kitei ki nongsiat mrad ka dang iaid shaphrang.
