Nongpoh, Lber 27: Uwei na u Samla ba don ka jingduna ha ka dkhot met na Ri Bhoi District u la mih shakhmat ban dawa na ka sorkar MDA-II jong ka sorkar Meghalaya ba la dei ka por ban pynkiew noh ia bai bam jong kito briew kiba don ka jingduna ha ka dkhot met bad ruh ban pynkiew ia ka bai bam jong ki tymmen ki kro.
Une u samla ba don jingduna ha ka dkhot met, u dei u samla Pering Pale na ka shnong Umpowin ha Ri Bhoi District ha kaba u la mih shakhmat ban dawa ia ka hok jong kito kiba don ka jingduna ha ka dkhot met bad ruh ka bai bam tymmen na ka bynta ki tymmen ki kro.
Haba kren sha ki lad pathai khubor, u Samla Paring Pale, u la ong ba kum uwei na u samla ba don jingduna ha ka dkhot met da ka jingngewkhia u hap ban kren ia ka jingeh jong kito kiba don ka jingduna ha ka dkhot met bad ruh na ka bynta ka hok jong ki tymmen ki kro, namar ka jingsiew ka sorkar ia bai bam kaba long tang Rs.750 shi bnai ka dang buh jingeh ia ki ban im jakpoh na katei ka lad jingiarap ba ai ka sorkar.
U la ong ruh ba kum u samla ba don ka jingduna ka dkhot met u la ioh ia ka bai bam kaba long Rs. 750 shi bnai mynt la 25 tylli ki snem bad kaei kaba sngewlyngngoh ka long ba ka sorkar haduh mynta kam pat lah ba pynkiew ia kane ka bai bam bad kaba sngewsih pat ka long ba ka sorkar ka kloi pat ban pynlut phuto ia ka pisa na ka bynta ki tamasa lehkmen da kaba klet pat ia ki ba ki donnkam shisha ia ka jingiarap ka sorkar.
“Da ka mynsiem kaba sngewkhia u la dep ruh ban ia kynduh ia u Myntri ka tnat Social Welfare ba kren halor kane ka jingeh kito kiba duna ka dkhot met bad na ka bynta ki tymmen ki kroi, hynrei kane ka jingkynduh ban kren ia ka jingeh jongki ba duna dkhot met bad ki tymmen ki kro kam shym la urlong satia ban pynkiew ia kata ka bai bam lyngba ka jingiarap na ka sorkar” ong u Samla Paring Pale.
Shuh shuh, kum uwei u samla uba don kata ka jingsngewkhia halor kane ka jingeh kiba duna dkhot met bad ki tymmen ki kro, u la buh ruh kata ka jingkyrpad naduh u myntri rangbah ka jylla, u Conrad K. Sangma, ki myntri sorkar bad ki MLA ba la dei ka por ba kin kren ia kane ka jingeh jongki, khnang ba lada ka sorkar ka lah ban pynkiew ia ka bai bam ka long ka jingiarap kaba khraw ia kito kiba duna dkhot met bad ki tymmen ki kro ban kyrshan ia la ka jong ka jingim ha sla jong kane ka pyrthei, u la bynrap.
