Nongpoh, Rymphang 28: Ka jingthmu ki Pulit ka Assam ban leit khynra ne tohkit ia ka skulbah University of Science and Technology, Meghalaya, kaba don ha Baridua, Killing mynta ka sngi ka la pulom noh, kaba dei hadien ba ka tnad Pulit na Ri Bhoi kam ai bor satia ne ia snoh kti lang halor jingpan jingiarap ki Pulit ka Assam.
Kumba la ioh lum jingtip, kane ka jingthmu ki Pulit ka Assam ban leit khynra ia ka skulbah USTM, ka dei katkum ka mokotduma ba la ujor ha Karimganj Police Station pyrshah ia u Chancellor ka USTM.
Haba ioh ban ia kren bad u heh Pulit ka Ri Bhoi, u V.S Rathore, u la ong ba ki puit ka Assam mynta ka sngi ki la wan poi ha Khanapara Police Station da ka jingthmu ban leit khynra ia katei ka skulbah USTM ha Baridua bad kine ki Pulit ka Assam ki la hap ban leit phai noh hadien ba ka tnad Pulit kam shym la ai bor ban leit khynra ne kyntait ban ai jingiarap halor kane ka jingthmu ban leit khynra ia katei ka skulbah.
Shuh shuh, u la ong ruh ba ka tnad Pulit na Ri Bhoi ka la kyntait ban ia snoh kti lang ha ka jingleit khynra, ka dei na ka daw ba ioh ktah ka shongsuk shongsain (Law & Order Problem), kaba dei ruh halor ka jingtmu ban wan iuh kjat ka myntri ka pla tyngka jong ka sorkar pdeng. Na ka liang ki pulit ka la btah ruh ia ki Pulit ka Assam ba lada ki thmu ban wan khynra ia ka USTM ki dei ban pan bor (Search Warrant) na ka ïingkashari shwa ba kin pynlong ia ka jingleitkhynra.
Ban pynkynmaw, u Chancellor ka USTM u Mahbubul Hogue , u la shah kem dang shen ha ki Pulit ka Assam ha ka 22 tarik u Rymphang 2025, halor ka jingkynnoh lehthok ia ka CBSE Class 12 exam ha ka skul kaba don ha Patharkandi, Assam, ba la pyniaid da ka Education Research and Development Foundation (ERDF) Group ba la seng da u Mahbubul Hogue kum u Chancellor ka USTM, Meghalaya.
