Nongpoh, Lber 01: Ha kawei na ka jingiatyngkhuh kali kaba la jia mynta ka sngi ha ka por 3 baje ei ei mynstep, uwei u dribar u la duh noh ia la ka jingim, hadien ka jingsah tynrah ha katei ka trok Tanker kaba la jia ha jan ka khyrdop ka tnad Forest kaba don ha 12mile, Ri Bhoi District.
Kumba la ioh lum jingtip, la ong ba kawei ka Trok kaba don ia u number ML 11 A 1348 bad ba la niah da u Mackswell Dkhar (36) na ka shnong Rymbai Khliehriat, East Jaintia Hill u dang pyrshan ban pynphai ia ka Trok bad katba dang pynphai ia ka trok kawei na ka shaka jong ka trok ka la bthei bad u la mih ban peit ia ka shaka jong ka trok, hynrei ha kane ka por kynsan kynsan kawei ka Trok Tanker kaba don ia u number ML 05 AC 7700 ka la tynrah kynsan ia ka Trok kaba la wan rah ia ka jingmynsaw jur jong u.
La ong ruh ba kane ka jingjia, ka la jia, ka dei namar ba u dribar ka Trok tanker um shym la iohi ia ka trok bad ia u dribar bad kynsan kynsan ula tynrah haduh ba utei u dribar ka trok u la mynsaw jur bad utei u dribar ka Trok tanker pat u la phet krad na katei ka jaka.
Ia u dribar katei ka Trok u Mackswell Dkhar la rah noh mardor sha CHC Byrnihat ban ioh ia ka jingsumar na ka jingmynsaw, hynrei hadien ba la poi ha katei ka jaka ai jingsumar ki Doctor ki la pynbna ba u la khlad noh.
Ia ka met jong une u dribar ba la khlad la rah noh sha Civil Hospital Nongpoh ban leh ia ka postmortem bad ia kitei ki trok la rah noh sha Byrnihat Police Oupot ban bteng ia ka jingtohkit.
Shuh shuh, halor kane ka jingjia, na ka jingiatyngkhuh kitei ki trok ka la wan rah ka jingdheng kali kaba la kot sha ka 5 kynta bad bun ki Kali paidbah ki la sahkut ha ki surok tad haduh ba la lah ban tan noh ia katei ka Trok da ki Pulit ba ka jingdheng kali la lah ban weng noh ha kane ka surokbah.
