Nongpoh, Kyllalyngkot 08: Ka Seng Hynniewtrep Integrated Territorial Organization (HITO), Ri Bhoi District, mynta ka sngi ka leit syndon ban ujor da ka jingthoh sha ka ophis u Deputy Commissioner ka ri Bhoi ban dawa tohkit bad pynsangeh ia ka jingkynnoh khrong pisa na Ki Kali kit syiar kiba wan sha kane ka jylla.
Ia kane ka jingthmu ban ia kynduh ia u Deputy Commissioner ka Ri Bhoi, u Abhilash Baranwal la ialam da u President ka HITO Ri Bhoi District, u Bah Shaniah Nongrum bad la synran lang da ki dkhot, hynrei namar kajingbym ioh lad ban ia kynduh ia u Deputy Commissioner ki la shu aiti noh ia ka shithi ujor ban dawa shim khia halor katei ka kam khrong pisa na ki Kali kit syiar, ba ka seng ka dawa ban pynsangeh shi syndon.
Haba kren sha ki lad pathai khubor, u President ka HITO Ri Bhoi District, u Bah Shaniah Nongrum, u la ong ba ka seng ka la ju pyrshah ruh halor kane ka jingwan poi ki syiar na shabar ka jylla ba ka pyniap ia ki khun samla kiba ri syiar hapoh ka jylla bad nalor kata ka seng haba ka la ioh jingtip ba ka don ka jinglum pisa jubor ia ki Kali kit syiar ba la poi haduh T. 30 hajar, kane ka la pynbitar ia ka seng bad ba ka seng kam banse ban ujor noh da ka jingthoh sha ka ophis u Deputy Commissioner ka Ri Bhoi.
U la kynnoh ruh ba kane ka jinglum pisa ka dei ka jingdon kti ka All Meghalaya Poultry suppliers and Retailers Association lem bad kiwei kiba don kti bad na ka liang ka seng kan pyrshah jur bad ka la kyrpad ruh ia u deputy commissioner ka Ri Bhoi lyngba katei ka jingthoh ba dei ban pynsangeh shi syndon ia kane ka jinglum pisa na ki Kali kit syiar.
U la ong ruh ba kane ka jingwan poi ki syiar kiba nabar ka pyniap ia ki samla ba ri syiar ha ka jylla bad dei namar kane ka daw ka seng ka pyrshah ban wan poi ki syiar kiba na shabar ka jylla. Ka seng ka ieng ha ka nongrim ym tang ban kyrshan ia ki samla ba ri syiar ha ka jylla bad ka pynpaw ruh ia ka jingpyrshah ba ka jingrung ki syiar kiba na shabar khlem da peit da ka khmih da ka tnad Veterinary lyngba ki doctor ka buh jingma ruh ia ki paidbah ban bam ia ka doh syiar.
Namar kata, u la ong ba ka seng ka dawa na ka ophis u Deputy Commissioner ba dei ban pynsangeh shi syndon ia katei ka jinglum pisa na ki Kali kit syiar bad lada ka dang iaid bteng ka seng kam salia ban hiar madan ban ialeh pyrshah ia kane ka jinglum pisa na ki Kali kit syiar kiba wan rung sha kane ka jylla, u la bynrap.
