NONGPOH, K’LYNGKOT 06: Hadien ka jingmih noh u Bah Victor Rani, MDC ka Jirang Konstituensi na ka party National People’s Party (NPP), kaba la buh jingeh ia ka party ban rai ia ka ticket MDC na Jirang Constituency, ki nongialam ka NPP Jirang Block hadien ka jingiashon pyrkhat kaba dei ha ka wat kaba ar, mynta ka sngi ki la shim noh ia ka rai ba radbah ban pyniakhun noh hi da u MLA kum u kyrtong MDC na Jirang Constituency ha kane ka election MDC hapoh ka jylla.
Kum ban pynkynmaw, na ka jingmih noh u Bah Victor Rani kum u MDC ka NPP, ki la don ruh haduh 3 ngut kiba la pan ticket MDC ban ia khun na Jirang Constituency ba kynthup ia u Bah Albertus Lapang, Kitbok Khongiong bad u Bah Balawan Syiemiong, hynrei namar ka jinglyngkot palat ka por da kawei ka jingmut ki la shim ia ka rai ban pyniakhun noh hi da u MLA u Bah Sosthenes Sohtun, kaba dei hadien ka jingmih noh u MDC u Bah Victor Rani, uba la leit ban pyniasoh sha ka Congress bad ruh uba la pan ticket ban ia khun a ka Congress na Jirang Constituency.
Ia kane ka rai ban pyniakhun hi da u MLA u Bah Sosthenes Sohtun, la shim rai mynta ka sngi ha ka jingialang kaba la long ha Byrnihat ba la shim bynta da baroh ki nongialam ka NPP Jirang Block, ki nongialam na ka NPYF bad kynthup ruh ka Women’s Wing ka party NPP hapoh Jirang Constiteuncy.
Haba kren sha ki Lad Pathai khubor hadien ka jingialang, u Bah Siewdor Syngkli President ka NPYF, Jirang Block bad ka Kong R U Kharbani, Spokesperson ka NPP Women’s Wing, ki la pynpaw, ba na ka liang ka NPP Jirang Block ki la ibit ba u Bah Sosthenes Sohtun ba un mih hi dalade ban aireng ha kane ka ilekshon namar ba kum ki nongialam bad ki nongkyrshan ki la phaikhmat ia u ban mih kum u kyrtong na ka party ban pynjop don burom kum u MDC ha kane ka election MDC na Jirang Constituency.
Ki la pynpaw ruh, ia ka jingsngewkmen bad ka jingsngewskhem ban ioh jingjop ha kane ka ileksion MDC ban wan, namar ba baroh ki nongialam ka party ha ryngkat ki nongialam shnong bad ki paidbah ki dang sngew skhem ban kyrshan ia ka party ha kane ka ileksion, bad ka jingmih noh jong u Bah Victor Rani na ka party kan nym don jingktah satia ia kane ka party ha kane ka election MDC, ki la pynpaw.
Shuh shuh, ki la ai khublei kaba kyrpang ia u Bah Sosthenes Sohtun u ba dei u MLA ka party u ba da ka jingsngewrit um shym la kyntait ia kane ka jingangnud jong ki nongialam ka party kiba don da kawei ka jingmut, namar ha ka jingkhim jong ka por ba un shimti hi ia ka rai ban mih kum u kyrtong MDC na ka party NPP ha ka ilekshon ban wan, ha kaba kum ka party hi ka don ia ka jingkyrmen kaba skhem ban ioh ia ka jingjop ba don burom na Jirang Constituency.
