Nongpoh, Naiwieng 30: Ka Annapurna Devi, ka myntri ka sorkar pdeng ba dei peit ia ka tnad Women and Child Development mynta ka sngi ka la wan ban iuh kjat ha Ri Bhio District na ka bynta ban bishar ne peit bniah ia ki kam pynroi bapher bapher ba la pyntreikam lyngba ki skhim ba la mang da ka sorkar pdeng.
Ha kane ka jingwan jurip, kane ka myntri ka sorkar pdeng ka la leit jurip ruh ia ka Primary Health Centre Byrnihat, ka Aganwadi Centre ha Saiden bad ka la kynduh kyrpang ruh ia ki SHG bapher bapher ba ka la ioh ban ia kren ne mir jingmut halor ki jingpyntreikam ia ki kam pynroi na ka sorkar pdeng.
Ha kane ka jingwan jurip la synran lang ruh da u Sampath Kumar uba dei u Principal Secretary ka tnad Social Welfare, u Abhilash Baranwal, Deputy Commissioner ka ri Bhoi bad kiwei kiwei ki heh ophisar na ka sorkar.
Ka Annapurna Devi, ha kane ka jingwan iuh kjat ia ka Ri Bhoi, ka la iaroh ia thong jong ka sorkar ba la tip kum ka Meghalaya’s Early Childhood Development Mission bad ka kren ruh ba ka long kum ka nuksa kaba bha tam ha ka ri halor kane ka jingshim khia ban phai khmat sha ka jingbha jingmiat ki khynnah bad ruh ban saindur ia ka jingim ki khynnah. Ka la iaroh ruh halor ka jingpyntreikam ia ka state’s Chief Minister’s Safe Motherhood Scheme (CM-SMS), kaba long kawei na ka lad ban pynduna ia ka jingiap ki longkmie ba kiba armet ne kiwei kiwei ki longkmie.
Na kane ka jingwan jurip, kane ka myntri sorkar pdeng ka la shim bynta ruh ban kynduh kyrpang ia ki nongshong shnong naduh ki SHG, ba kiei kiba la pynpaw kan sa shim khia ban kren sha ka sorkar pdeng. Ka la kular ruh ban pyntreikam kyrpang ia ka SNP-ICDS programme bad ban phai khmat kyrpang sha kito ki shnong kiba donkam ka jingiarap na ka sorkar pdeng.
Hadien ka jingjurip, la pynlong ruh ia ka jingiakynduh lang (Review meeting) ha ka ophis u Deputy Commissioner ka Ri Bhoi, ba ia tai ne ia thir halor ka jingpyntreikam ia ki skhim bapher bapher bad ki jingmyntoi ba ki paidbah ki ioh na ka jingpyntreikam ia ki skhim ka sorkar kmie.
