NONGPOH, NAIWIENG 30: Ha ka jingialang ka party UDP Umsning Constituency kaba la long mynta ka sngi ha Umsning Auditorium Hall, Umsning, ka kyrteng jong u Bah Eddie G. Kharbani ka la sawa jur ban long kum u kyrtong ka UDP na Umsning Constituency ha kane ka election MDC ban sa wan sha ka ing dorbar thaw ain ka KHADC.
Da ki hajar ngut ki nongkyrshan ka UDP na kylleng ka Umsning Constituency ki la wan ban shim bynta ha kane ka jingialang ka UDP bad nalor ki nongkyrshan la don ryngkat ruh ki nongialam naduh u President ka UDP Umsning Constituency u Bah Sunshine Makri, u Bah Rocky Kylla, Vice president, u Bah B. Sylliang, General Secretary, u Bah F.A Syngkli, Joint Secretary, u Bah Diamos Syiem, Chief organizing Secretary bad kiwei kiwei ki nongialam ka party.
Ia kane ka jingialang la lum shi bynta ban pynbuhjli ia ki nongialam bad kumjuh ruh ban pynkhlain ia ka party bad lyngba kane ka jingialang pat ka la mih ka sur kaba sawa jam ba ki nongialam bad ki nongkyrshan ki la rai ban pynskhem beit ia u Bah Eddie G. Kharbani kum u kyrtong ka UDP na Umsning Constituency ba kin sa phah ia ka kyrteng sha ka District bad sha ka State.
Haba ai jingkren ha kane ka sngi naduh u General Secretary u Bah B. Sylliang, u Vice President bad kiwei ki nongiala ki la pynthikna lypa ba ka ticket na ka bynta election MDC na Umsning Constituency kan leit beit sha u Bah Eddie G. Kharbani bad ki la rai ruh ba lyngba ka election committee kin sa phah ia ka kyrteng u Bah Eddie G. Kharbani na ka bynta ban pynskhem na ka district bad na ka State UDP.
Haba kren ha kane ka sngi, na ka liang u Bahh Eddie G. Khabani ruh u la pynpaw iaka jingkmen ban iohi ba ki nongkyrshan bad ki nongialam ki la ai ia ka jingkyrshan kaba pura ba un long kum u kyrtong ka UDP ha kane ka election MDC ban sa wan bad na ka liang jong u ruh u la kular ban trei rad bah bad ruh ban ia trei ryngkat na ka bynta ka jingjop kaba long ka jingjop ym tang ia u kum u kyrtong bad ka dei ka jingjop jong ki nongkyrshan bad ki nongialam baieid ka UD na Umsning Constituency.
