‘KA SUROK REL KA DEI KABA KA SENG KA DANG PYRSHAH JUR’.
NONGPOH, JYLLIEW 22:
Ha ka sien kaba san u Samla Ferdynald Kharkamni u la shah jied biang kum u President ka KSU North Khasi Hills District Unit ha Ri Bhoi, kaba dei ha ka General Election kaba Khadwei kaba la pynlong mynta ka sngi ha Ing Dorbar Hall ka Shnong Nongpoh ha Sajer.
Haba pynlong ia kane ka General Election ban jied biang ia ki nongialam na ka bynta ka samoi 2024-2027 la pyniaid da ka Election Committee bad ruh da ka jingdon lang ki nongialam ka Sengkmie ba kynthup ia u Raymond Kharjana Organising Secretary bad kiwei kiwei ki dkhot.
Ha kane ka electin ban pynthymmai ia ki nongkitkam ka KSU North Khasi Hills district Unit, ha kane ka kynti ruh ki nongialam bad ki dkhot ki la ibit biang ban jied ia u Sala ferdynald Kharkamni kum u President na ka bynta ban ialam ia kane ka kynhun na Ri Bhoi ban ai ka jingshakri sha ki paidbah ka Ri Bhoi bad ka jylla hi baroh kawei.
Nalor ka jingshah jied u samla Fedynald Kharkamni kum u President ba thymmai, kiwei kiwei kiba la shah jied pynthymmai mynta ka sngi ki kynthup ia u Vice president ba la jied ia Samla Joseph Lambok Rymbai, James Hitler Mawphñiang kum u General Secretary, Samla Banjop Maring Assistant Secretary, Samla Baiashanlang Kharshanlor Organising Secretary, u Samla Toning Lapang kum u Education Secretary, Richard Roy Lyngdoh Nonglait kum u Information and Publicity Secretary, U Samla Johny Nongrum kum u Sports Secretary, Samla Jefrey Wahlang kum u Environment Secretary bad u John Lyngdoh kum u Office Secretary.
Haba ia jingkren ha kane ka sngi, na ka liang u Samla Ferdynald Kharkamni u la ai khublei kyrpang ia baroh ki nongialam bad ki dkhot ka KSU kiba la ibit biang ban ai ia ka lyngkor kum u nongialam ba hakhmat jong ka seng ban ai ka jingshakri sha ki paidbah ka Ri Bhoi.
Shuh shuh, u la pynpaw ruh ba dang don shibun ki mat ki jura ha Ri Bhoi bad ha ka jylla hi baroh kawei ba ka seng ka dang hap ban treibor bah ban iada kyrpang ia ki paradoh ki parasnam ha ka jylla bad haduh mynta kawei na ka mat kaba ka seng ka dang pyrshah ka dei ka jingthmu ban wan rah ia ka surok rel ha ka jylla bad ka seng kan dang iaid pyrshah katba ka sorkar jylla kam pat lah ban wan rah ia kita ki ain ne ki jingiada kiba kyrpang ia ki paradoh ki parasnam hapoh ka jylla, u la bynrap.
WAN PHAI BIANG U SAMLA FEERDYNALD KHARKAMNI KUM U PRESIDENT KA KSU HA RI BHOI
