PYNREM JUR KA KSU EJHDU ÏA KA JINGLEH DONBOR KI BSF HA KULIANG

Khliehriat, Jylliew 23: Ka KSU East Jaintia Hills District Unit kala pynrem jur ïaka jingleh donbor jong ki shipai BSF haka 19 bad 20 tarik ha ka Shnong Kuliang ha ka por mynmiet da kaba shoh bad bom ïa ki kynthei khynnah ki rangbah khlem map shuh, bad kum kine ki jingjia ki dei ruh kiba ju jia naka por shaka por.
Haba phah ïaka kyrwoh naka liang ka seng KSU kala pynpaw ba kane ka jingleh donbor kine ki BSF kam dei shuh ka sien ba nyngkong hynrei la bunsien. Ki paid nongshong shnong ka Sonapyrdi, Huroi, Umkiang ki la ujor bunsien sha kiba dei khmih naduh ki SP, DC, hynrei kine ki khlem leh eiei ka shu kut khlem seisoh.
Kane ka la pynlong ruh ïa ka Seng ba la lam khmat da u General Secretary ka seng u Samla KS Suchiang, Asst GS Pynshai Kupar Dkhar ban leit ujor sha ka DGP ka jylla dang shen ban leh eiei ban pynkynriah ïa kine ki BSF kiba ha Sonapyrdi bad kito Kiba don ha NH-6 ha khappud jong ka shnong Dona, Umbluh bad Ratachera namar ka jingdon jong ki ha kito ki jaka kim lah satia ban teh lakam ïa ka jingwan rung tuh ki khar Bangladeshi sha ka jylla. Kum ban pynkynmaw ka seng ka la dep ïa kren ruh bad u Bah Prestone Tynsong Symbud myntri rangbah ka jylla ba dei peit ïa ka tnad kam poh Iing hynrei ka khlem poi shaei shaei ruh ka kut tang ka kular.
Ka KSU EJHDU ha ka 21 tarik mynta bnai Jylliew 2024 ka la ioh ruh ban ïa kynduh ïa u Bah G. Warjri ADC EJHD namar ka jingbymdon u DC. Ka seng ka la buh ka jingujor halor halor kato ka jingjia ha shnong Kuliang kaba la jia ha ka 19 tarik mynta bnai Jylliew 2024 kaba ki BSF ki la rung jubor ha kato ka ïing shiteng synñia. Ha ka jingthoh ka seng ka la dawa ban pynshitom katkum ka aiñ ia kito ki BSF ban leh da kaba tyngeh bad naka liang ka seng kan nang iai buddien ïa kane ka jingleh donbor ki shipai ïa ki paidbah.
Ka seng ka khmih lynti ba ka DGP kan leh ia ka ba dei tam, lada kam urlong ka jingdawa pynkynriah ïa kine ki BSF na kitei ki jaka, ka seng kan sa pyrkhat da kawei ka sien jam.
Naka liang ka seng kala leit jngoh sngewlem ruh ïa u rangbah ba shah shoh ha ki BSF uba la shitom jur naka jingshah shoh bad orpait ka shyieng krung bad shah sumar mynta ha Civil Hospital Khliehriat.