Umroi, Lber 19: Kawei ka longkmie ka la shah thombor kynsan bad shah pynmynsaw ha u wei u runar bym lah ban ithuh, katba kane ka longkmie ka dang thmu ban leit sha ka jaka trei ha Shillong Airport, Umroi.
Katkum ka khubor na ki pulit, la iathuh ba kane ka longkmie kaba la shah thombor bad mynsaw la tip kyrteng kum ka Kong Ellana Lyngdoh Mawphlang kaba trei ha Shillong Airport, na Madanryting, East Khasi Hills District bad kaba shongwai ha Umroi Nongrah.
La iathuh ruh, ba kane ka jingjia shah thombor tad haduh ba kane ka longkmie ka la mynsaw jur ka la jia ha ka por 8 baje eiei mynstep jong ka 19 tarik Lber 2025 hashwa ban poi ha Shillong Airport, ha kaba u runar bym lah ban ithuh u la patan ia kane ka longkmie bad pynmynsaw da u bitor beer bad lynthem ruh da u maw.
Shuh shuh ruh la ioh jingtip, ba ha kane ka jingjia katei ka longkmie ka la mynsaw jur bad la pynkit sha Bhoirymbong CHC ban phah sumar hynrei namar ka jingmynsaw kaba jur la pynkynriah noh sha NEIGHRIMS hospital Shillong.
Na ka liang ki pulit ka Khapmara PIC hadien ba la ioh jingtip halor kane ka jingjia ki la mareh marmar sha katei ka jaka ban pynlong ia ka jingtohkit bad ruh ban tam ia u bitor beer ba la pyndonkam ban pynmynsaw ia kane ka longkmie kumjuh la ioh jingtip ba ia u tei u runar ba la thombor ia ka longkmie ki pulit ki la ithuh bad kin sa kem noh shen.
