Wat hapdeng ka jing long kyrpang naka jingduna ka bor iohsngew bad ym lait ban kren, kawei ka samla naka shnong Pyndengrei, Nongstoiñ kala shah jied haka Meghalaya Arm Wrestling Association (MAWA) ban leit mihkhmat ïaka jylla bad ka ri India sha ka lympung ïakhun kti ba heh duh haka pyrthei bala tip kum ka World Arm Wrestling Championship 2024 ban long ha u bnai Nailar haka ri Maldova.
Katei ka samla kaba don ka sap ïakhun kti ka dei ka samla Aisilda Thabah 15 snem ka rta, ka dei ka khun jong u Bah Phangstar Nongsiej bad ka kong Colita naka shnong Mawphansien bad kiba la shong la sah haka shnong Pyndengrei Nongstoiñ, West Khasi Hills District.
Katei ka samla ka dei ruh kaba la leit ban shim bynta sha bun ki lympung ïakhun kti bapher bapher bad dang shen kala khur jingjop ruh haka jingïakhun National Arm Wrestling & Para Arm Wrestling Championship 2024 kaba la long ha Nagpur jong ka jylla Maharashtra.
Watla katei ka samla kala shah jied ban leit shim bynta sha katei ka jingïakhun kaba heh haka pyrthei hynrei kam long pat kaba suk namar katei ka samla ka wan naka longiing longsem kaba duna haka ioh ka kot bad tang ka bai leit bai wan sha katei ka jingïakhun kala poi kumba 2 lakh shiteng eiei, bad katei ka samla ka donkam ka jingkyrshan naki paidbah ka jylla ba kan poi sha katei ka lympung bad lehse kan wanrah ruh ka nam ka burom hadien ba kala wanphai.
Shuh shuh naka liang u Bah Aibanlumlang Marngar President ka West Khasi Hills Arm Wrestling Association u la ong ba kum ka seng ruh kam kotbot shuh ban pynlut naka bynta ka samla Aisilda bad kyrpad ruh ïaki paidbah ban ai ka jingkyrshan khamtam ka sorkar ba ka dei ban phai khmat sha kum katei ka samla kaba donsap wat hapdeng ka jingduna dkhot met hynrei ka trei shitom ban poi shaduh katei ka lympung.
