Ka Tamasa Sohtrun kaba la tip kum ka Meghalaya Pineapple Festival, ia kaba la pynlong da ka sorkar jylla ha Dilli Haat, Nongbah Delhi, ka la long kaba shongkun eh bad bun ki briew na Delhi lem bad na kiwei ki jylla, ki la leit ban sakhi ia katei ka Tamasa Sohtrun, ban leit mad khnang ia u Sohtrun na Meghalaya bad ruh ban peit ia kiwei de ki tiar ki tar, kiba la rah na Meghalaya sha Nongbah Delhi.
Katei ka tamasa sohtrun ba san sngi, ka dei kaba la sdang naduh ka 10 tarik bad kan kut ha ka 14 tarik mynta u bnai, ha kaba la pynlong ia katei ka tamasa da ka tnat Horticulture, ha ryngkat ka jingiatreilang ka tnat Tourism lem bad ka Meghalaya Collectives, kiba la pynlong khnang ia katei ka Tamasa Sohtrun, khnang ba ki briew na kylleng ki jylla bad ri ka pyrthei, ba kin ïoh mad ia ka jingbang jingthiang u Sohtrun na Meghalaya.
Ki briew na kiwei ki jylla, kiba la leit ban sakhi ia katei ka Tamasa, ynda ki la ïoh ban mad ia u Sohtrun na Meghalaya, ki la ai shisha ia kata ka jingiaroh, da kaba ong ba u Sohtrun na Meghalaya, u dei uba bang tam na baroh ki jait Sohtrun ba ki la ïoh ban mad.
Katba ki briew na Meghalaya, kiba la leit ban die ia u Sohtrun ha katei ka tamasa, ki la ong ba ka jinglah ka sorkar jylla ban pynlong ia katei ka tamasa Sohtrun, kan nangpynpaw nam ia u Sohtrun na Meghalaya bad ba kiwei ki jylla kin tip ba u Sohtrun na Meghalaya u dei uba bang tam eh.
Ki la ong ruh ba jin lada ka sorkar kan nanglah shuh shuh ban pynlong ia kiba kum kitei ki Tamasa sa ha kiwei kiwei de ki jylla, kaba mut ba u Sohtrun na Meghalaya, u sa dei uba pawnam bad ba baroh ki briew ha India kin tip bad ha ki ri ka pyrthei ruh kumjuh.
