Nongpoh, Nailur 14: Ka Nongpoh Town Committee lyngba u Chairman u Bah S.F Lyngdoh bad u Secretary u Bah R.Kharkamni ki la phah ia ka khubor sngewlem halor ka jingkhlad noh u Dr.DD Lapang kum u MLA barim ka Nongpoh bad ruh u Myntri barim ka Jylla.
Kitei ki nongialam ka Nongpoh Town Committee ha kane ka khubor sngewlem ki la pynpaw ba ka jingkhlad noh u Dr. DD Lapang ka long ka jingduh nong kaba khraw ym tang ia ka iing ka sem, ki khun ki kti bad ka kurim jong I, hynrei ka jingduh nong kaba khraw ruh ia ka Nongpoh, ka Ri Bhoi District bad ha ka jylla hi baroh kawei.
Ki la pynpaw ruh ba kum u nongialam uba la bat ia kyrdan MLA bad Myntri rangbah ka jylla u la noh synniang shisha ha baroh ki liang ban kyntiew ia ka Nongpoh, ka Ri Bhoi District bad ha ka jylla hi baroh kawei.
Ki la ong ruh ba u Dr. DD Lapang u don shisha ia ka kyrdan nongialam ha kaba ym tang ba u la shakri ia ki paidbah ka jylla bad ruh u long ka jingai mynsiem ia kiwei pat ki para nongialam ba kin bud ia ki dienjat jongu ha ka kyrdan kum u nongialam uba don ka jingkitkhlieh ha baroh ki liang.
Shuh shuh, ki la ong ruh ba ka jingkhlad u Dr. DD Lapang ka long shisha ka jingduh kaba khraw bad na ka liang ka Nongpoh Town Committee ka phah ia ka khubor sngewlem sha ka ing ka sem, ki khun ki kti bad ia ka kurim ba u Blei un ai ia ka jingpyntngen halor ka jingduh noh ia une u nongialam bad ka Nongpoh Town Committee ka buh ruh ia ka jingduwai ba U Blei un ai ia kata ka jingjah thaid ia ka mynsiem jong I kaba shi junom ha khet Bneng.
