Shillong, Nailur 15: Shwa ban ban leh burom da ka sorkar jylla lane ka State Funeral ban leh burom khatduh ia ka met ba dang sah jong u Dr. D.D Lapang ha Madan Student, Shillong, da ki ummat ka jingsngewsih bad ka jingbynnud la sdang noh ia ka jingleh burom khatduhda ka ïing ka sem, ka shnong ka thaw, ka Balang bad kynthup ki kynhun bapher bapher naduh ka Ri Bhoi Dorbar, ka RBDSA, ka Ri Bhoi Synod lem bad kiwei kiwei de, kiba la pyndep ban ai ia ka burom shwa ban leit on tep noh ia une u nongialam ba radbah jong ka jylla.
Ia kane ka jingleh burom da ka ing ka sem bad kiba ieit ba thoin bad ryngkat ka jingleh niam da ka Balang la sdang naduh ka por 10 baje mynstep na ka ïingsah jong I, ha Lachumiere, Shillong.
Kum u nongialam ba la noh synñiang shibun ha ka jylla, kiba bun ki riew pawkhmat ki la niew la tang ia u synniang u bynhei jong u Dr. D.D Lapang, hakaba u Dr. D.D Lapang ym dei tang uta uba la don bynta ha ka kam sain hima sima, hynrei u la don bynta lut ha ka imlang ka sahlang, ha ka kam jong u Blei bad ha kiwei kiwei ki kam kiba long u synniang ban kyntiew ia ka jylla bad khamtam eh ha Ri Bhoi District.
Kum ban pynkynmaw, u Dr. D.D Lapang u dei u MLA barim ka Nongpoh bad u Myntri barim ka jylla bad ha ka jinglong nongialam u la lah ban leh shibun ki kam kiba bha, kiba long ki matti ki ban sah jingkynmaw wat la um don shuh ha sla jong kane ka pyrthei.
