Nongstoin, Nailar 01: Ki pulit ka Nongstoin Police Station ki la kem ia u Koldingstar Thongni 22 snem ka rta u bala suba don kti ban pyniap ia u Bah Elbin Kharbani u ba 60 snem ka rta, ban thombor ia ka tnga jong u ka Kong Seldaris Kharsyntiew, bad ka jingkynnoh rahbor ia ka khun khatduh jong ki kaba dang 18 snem ka rta, kaba la jia ha ka por kumba 2:00 baje eiei mynstep jong ka 31 tarik u Naitung ha ka shnong Mawrok Porsohsat kaba don ha West Khasi Hills district.
Haba kren sha ki lad pathai khubor mynta ka sngi, u Superintendent of Police ka West Khasi Hills District u bah H.P Kharkongor, u la ong ba ia une u suba don kti la kem na Khlieh Iew Nongstoin, ha ka por kumba 8:00 baje eiei mynmiet jong ka 31 tarik u Naitung hadien ka jingkhynra kaba jur da ki pulit ka Nongstoin ryngkat ka jingiarap jong ki dkhot ka VPDCNA.
Katkum ka jingiathuh jong u SP, ha ka jingtohkit u Koldingstar Thongni u la phla ba u la ot shwa ia ka bording ilektrik ha katei ka iing shwa ban rung jubor, nangta la kynnoh ba u la thombor ia kitei ki ar ngut shi kurim ha ka por ba ki dang thiah, kaba la wanrah ia ka jingiap jong u bah Elbin Kharbani bad mynsaw jur ia ka kong Seldaris Kharsyntiew.
Pule ruh: Bam duh ka ding haduh 8 tylli ki ïing ba suba thud ka bording ha Rilbong
Hadien katei ka jingthombor, la kynnoh ba utei u suba don kti u la ialam ia ka khun khatduh jong kitei ki arngut sha kawei ka khlaw kaba don ha ka shnong Syllei-Iawkhein kaba don marjan bad ka shnong Mawrok Porsohsat. Hynrei ha ka por kumba 3:00 baje janmiet jong ka 31 tarik u Naitung katei ka samla ba 18 snem ka rta kala ïoh ban phet krad katba u Koldingstar u dang thiah lyngngai ha katei ka khlaw bad kala poi suk sha la ïing bad mynta ka dang don ha Civil Hospital Nongstoin ban leh medical checkup.
Shuh shuh u Bah Kharkongor u la pynpaw ba ka jingtohkit kala lap ba u Koldingstar Thongni u dei u kurim bala iashong khlad bad ka samla kaba dang 18 snem ka rta kaba dei ka khun khatduh jong ki shi kurim kiba la shah thombor ha u bad katkum ka jingtohkit la la sngewthuh ruh ba ka daw jong katei ka jingjia kadei namar ba u Koldingstar Thongni u dom iala ki kiaw ki kthaw ba kim shym la shah ia u ba un ia shong ia sah ryngkat lang bad ka khun khatduh jong ki.
U SP u la ong ba ki pulit ki la ioh kurup ia ka tiar kaba la ngeit ba la pyndonkam ha katei ka kam thombor, ryngkat bad kiwei kiwei ki sakhi sabut kiba kdew ba u Koldingstar Thongni u dei u bala suba don kti ha katei ka kam runar nalor kata ki pulit kila lap ruh ba u dei u briew u bala don case teng ruh ha kiwei ki District.
Peit ruh:
Na ka liang jong ki pulit kila register ia ka mukotduma hapoh ki kyndon 103, 109, 118 bad 140 jong ka Bharatiya Nyaya Sanhita (BNS), bad ka jingtohkit kaba bniah ka dang iaid shakhmat.
