Nongpoh, Lber 05: U Bah Lehkmen Rymbui, Myntri ka tnat pule ha ka sorkar jylla, ha ryngkat u Bah Sosthenes Sohtun, MLA Jirang, uba dei ruh u Myntri ka tnat C&RD, mynta ka sngi, ki la leit ban plie paidbah ia ka building thymmai jong ka skul Umshru RMSA Secondary School, ba ka Sorkar Meghalaya, ka la pynieng ha shnong Umshru, ka shnong kaba don ha syndah eh bad ki shnong ka jylla Assam, kaba hap ha Jirang Constituency.

Ka jinglah ka sorkar Meghalaya lyngba ka tnat pule puthi ban pynieng ia ka Building ka skul RMSA ha katei ka shnong, ka la long kum kawei na ki sakhi ba ka Meghalaya, ka ialeh ban pynpoi ia ki kam pynroi ha ki shnong khappud bad khamtam eh ha katei ka thain ym ithuh shuh la ki briew ki dei ha Meghalaya ne Assam, namar ka dei ruh ka thain ba la shong la sah da kiwei ki jaidbynriew.

Ha katei ka skul RMSA la hikai da ki nonghikai kiba na Meghalaya, katba ki khynnah kiba leit ban pule ha katei ka skul kiba bun hi ki dei na kiba na ki shnong khappud kiba don hapdeng ka Meghalaya bad Assam.

Ia katei ka building thymmai ka skul RMSA, la tei ha ka jinglut kaba T. 1.30 klur, ha kaba la shna pynitynnad bha bad kaba la bit la biang bha, na bynta ban shong ki khynnah skul.

Haba plie ia katei ka building thymmai ka skul RMSA, nalor ka jingdon kitei ki arngut ki Myntri Sorkar, la sakhi ruh da ka u Bah Banteilang J. Kharshandi, Deputy State Project Director, u Samor Rabha, Rangbah Shnong Umshru, ka Cheerily Kharbohkhiew, Headmistress ka Umshru RMSA Secondary School lem bad kiwei.