Nongpoh, Lber 05: Kum uwei u samla rangbah ka dong Ri Bhoi bad ha ka jylla uba ju ai mynsiem ia ki khun samla ban kiew shaphrang ha ki bynta bapher bapher jong ka jingim, u Samla Evarist Myrsing uba dei ruh u Asst. Project Director HRDS-INDIA, New Delhi & CEO jong ka Ryntih Sports & Cultural Club, Shillong mynta ka sngi u la leit ban plie pyrda ia ka Annual Sports and Game ka St. Francis D’Assisi Higher Secondary School Umsiang Maiong kaba dei kawei na ka skul kaba don ha khappud ka Meghalaya bad ka Assam.
Haba plie pyrda ia kane ka Annual Sports and Games katei ka skul la sakhi langm, nalor u Dr. Evarist Myrsing kumm kongsan, kiwei kiwei kiba la ia don lang ki kynthup ia u Fr. Rajesh Kumar OMI kum u symbut kongsan, u Principal u Fr. L. Arul Doss OMI, Sr. Stella Mary DMI lem bad ki nonghikai, ki khynnah skul bad ki kmie ki kpa jong ki khynnah skul.
Ha kane ka Annual Sports and Games ba lai sngi kane ka skul, ki don haduh 4 tylli ki kynhun ba kynthup ia ka Blue House, Green House, Yellow House bad ka Red House, ha kaba kine ki kynhun kina ia knih ban ioh khur ia ki jingjop bapher bapehr ha kane ka lympung ialehkai sports ki khynah skul.
Hadien ba la dep ban plie pyrda da kaba thang sharing bad pynkiew ia ka lama jong ka skul kaba long kum ka jingpynbna ba la plie pyrda ia kane ka lympung, u Dr. Evarist Myrsing u la ai ruh ka jingkren ban bet ia ki symboh pyrkhat sha ki khynnah skul katei ka skul ba kum ki khynnah skul ki donkam ban don ruh ka met kaba koit ba khiah haba wad ia ka jingnang jingstad.
U la ai mynsiem ruh ia ki khynnah skul, ba ki dei ban long kita ki khynanh skul kiba tbit lut ha baroh ki liang ban poi sha ka thong kaba ki phohsniew ha ka jingim. U la kyntu ruh kum ki khynnah skul ki dei ban don ia ka akor ka burom, ka jinglong khuid ha ka jingmut jingpyrkhat, ka jingkoit jingkhiah bad kumjuh ruh don bynta ruh ha ki kam kyllan met, namar haba koit ba khiah ki lah ban pynleit jingmut ha ki jingpule bapoi sha ki kyrdan ba shaneng ba ha kane ka juk stad khlem ka jingnang jingstad kin nym lah ban poi sha ka thong jong ka jingim, u la bynrap.