Khliehriat, Jymmang 20: Haba kren mynta ka sngi kum u Symbut Myntri ka sorkar jylla ban pan ka jingkryshan ba pura na ki paidbah ka Ri Bhoi ha ka jingialap Election ha Iewmawlong ban pynjop don burom na ka bynta u Dr. DRL Nonglait kum u kyrtong ka NPP ha kane ka election MP shiteng samoi, u Bah Sniawbhalang Dhar u la ong ba ka NPP ka dei ka party kaba leh da ka kam bad kam don por ban pynbiej ia u paidbah.
U la ong ruh ba ka NPP ha ka jingialam u Conrad K. Sangma kum u National President bad u Bah Prestone Tynsong kum u State President ka NPP, ka dei ka party kaba ju ia khun na ka bynta ki paid riewlum ym tang ha ka jylla Meghalaya bad ha ki jylla shatei lam mihngi ka ri india hi baroh kawei.
U la ong ruh Conrad Sangma kum u Chief Minister ka Jylla, dei ma u, uba ju kren ia ka jingeh jong ki niam bapher bapher hapoh ka ri bad man ka por lada don ka jingshah banbein ki Khrist ne ki niam, dei ma u, uba kren sha ka sorkar India.
U la pynpaw ruh ba u Dr. DRL Nonglait u dei u riew rangbah uba la ih bha ban shim ia ka lyngkor nongialam kum u MP ka Shillong, namar u dei u briew uba la dep shakri lypa ia ki paidbah khamtam ha kaba kyntiew ia ka pule ka puthi hapoh ka jylla.
“La donkam ka jingiatylli hapoh ka jaid bynriew bad lada ngi pynjop ia u Dr. DRL Nonglait un sa long u ksiang u ban ia khun ha parliament na ka bynta ka jingeh ki paidbah khamtam ki mad jingdawa ba hakhmat kum ka ILP bad kiwei kiwei de” ong u Bah Sniewbhalang Dhar.
Sa Peit Ruh |
