Nongpoh, Jymmang 18: Haba sdang ban pan jingkyrshan na ki paidbah ka them Ri Bhoi ha kane ka election shiteng samoi na Shilong Parliamentary Constituency, u Dr. DRL Nonglait, u la ong kaba ka daw kaba la pynlong ïa u ban poi sha ka seng sain pyrthei, ka dei kaba u la im jingmut ban pynim ïa ka ktien Khasi ban don ka jingithuh kyrpang naduh ka sorkar kmie bad ka sorkar jylla.
Kum ban pynkynaw, ka sorkar ka la hap ban pynlong ïa ka election shiteng samoi na ka Shillong Parliamentary Constiteuncy, ka dei hadien ka jingkhlad noh u Dr. Ricky AJ Syngkon kum u MP bad mynta ka sngi u Dr. DRL Nonglait u la hiar sha Ri Bhoi ban pynlong ïa ka jingailang ha iew Mawhati ban pan ka jingkyrshan na ki paidbah na ka bynta ban pynjop don burom ïa u ha kane ka election shiteng samoi.
U la pynkynmaw ruh ka kot u Fr. H. Elias kaba ong, “haba im ka ktien, im ka jaid bynriew’.
U la ïathuh ruh ba u don ka thong ban pynim ïa ka ktien Khasi, u la bat kum u President la 14 snem ha ka Khasi Author’s Society ha kaba la pynlong ruh ïa ki jingïalang paidbah bapher bapher bad la leit kynduh ruh wat ïa ki Myntri sorkar pdeng, hynrei lada ki paidbah ki kloi ban pynjop da lade hi un leit sha Delhi ban ïa kren halor ka ktien Khasi.
Haba kren shaphang ka Khasi Author’s Society, lada ym don u President ruh u Vice President un shimti ïa ka kam bad la dep ïa kren ruh ba naduh ka 8 tarik u Vice President un shimti ïa ka kam.
Shuh shuh, kaei kaba u la pynpaw ka long ba u angnud ban leh ei ei na ka bynta ka jaid bynriew ha kaba lada u jop un ioh ban ïa thir ha Parliament ym tang ïa ka Ktien Khasi, hynrei un kren ruh ïa kiwei kiwei ki mat kiba lah ban tehsoh ïa ka jaid bynriew bad ruh ba ka jaid bynriew kan dang kiew shaphrang ha ki liang baroh, u la bynrap.
SA PEIT RUH ||
