Nongpoh, Jymmang 18: U Prof. Dr. DRL Nonglait kum u kyrtong ka party NPP ban aireng ha ka election shiteng samoi na ka Shillong Parliamentary Constituency mynta ka sngi u la hiar sha Ri Bhoi ban pynlong ïa ka jingïalang ha ïew Mawhati, ha kaba da ka jingsngewrit u la pan ka jingkyrshan na ki paidbah ka Mawhati bad Ri Bhoi District ban pynjop don burom ïa u ha kane ka election shiteng samoi halor shibun ki jingangnud jong u ban wan rah lada ki paidbah ki kloi ban pynjop ïa u.
Haba kren halor shibun ki mat ki jura ka jaid bynriew, u Dr. Nonglait u la pan ruh ka jingkyrshan ym tang na Ri Bhoi bad ruh na ki 36 tylli ki Constituency kiba don ha Khasi-Jaintia.
U la kyntu ruh ïa ki paidbah ka jylla ban weng noh ïa ka jingsngew pyrshah party, ban weng ïa ka jingisih para briew, ban weng noh ka jingiushun para briew, ban weng noh ïa ka jingïakynshoit bad dei ban wan ban ïa trei lang na ka bynta ka bha ka miat, ka shongsuk ka shongsain, ban kyntiew ruh ïa ka ri bad ka jaid bynriew bad ruh ban ïa ieit iwei ïa iwei.
“Lada ngim don kata ka jingïaieit para briew kumno ngin lah ban kyntiew ïa ka jaid bynriew” ong u Dr. Nonglait bad u la buhr uh ïa ka jingkyrpad jur ïa ki paidbah ba kin pynjop don burom ïa u na ka party NPP kaba don ha ka sorkar khnang ba kan long ka iktiar kaba khlain ban ïasaid ha parliament na ka bynta ki dawbah jong ka jaid bynriew.
Ha kane ka sngi la don ryngkat ruh naduh u Dr. Celestine Lyngdoh MLA ka Umsning, u Bah Charles Marngar MLA ka Mawhati, ka Kong Rona Khymdeit MDC ka Nongpoh lem bad kiwei kiwei kiba kren ban ïalap ïa ki paidbah ban pan ka jingkyrshan na ki paidbah na ka bynta ban pynjop don burom ïa u Dr. DRL Nonglait kum u Kyrtong ka NPP ha kane ka election shiteng samoi na ka Shillong Parliamentary Constituency.
SA PEIT RUH ||
