Ka Zynmed Pharmaceuticals, kawei na ki kompani pynmih dawai, mynta ka sngi kala pynbna ïa ka jingthmu ban sdang noh shen ka jingshakri ha ka thaiñ Shatei Lam Mihngi. Ka thong ba kongsan ka long ban pynpoi ïa ki dawai dashin haduh thliew iing ki paidbah, khnang ba kim donkam shuh ban leit thied sha ki dukan dawai. Kine ki dawai yn sa pynpoi da ki nongtrei ba la buh kyrpang, bad ka dor ruh kan kham duna haba nujor bad kiwei pat ki jait dawai ha ka ïew.
Ban pynbna paidbah ïa kane ka jingthmu, ka kompani kala pynlong ka jingïalang bad ki nongthoh khubor ha Guwahati. Ha kane ka jingïalang la pyntip ba tang hapoh ki bnai khyndiat ban wan, yn sa pyllait paidbah noh ïa ki dawai ba la pynmih da ka kompani bad pynithuh ruh ïa ki rukom treikam jong ka ha ka thaiñ Shatei Lam Mihngi.
Ha ka jingkren jong ki nongïalam ka Zynmed Pharmaceuticals, kaba kynthup ïa ka Aishi Ghosh Dastidar, kaba dei ka nongthaw jong ka kompani, bad ka Kabita Sarma Baruah, Director North East India, ryngkat ar ngut ki rangbah kiba mihkhmat na Meghalaya, u Bah Arban Sutnga bad u Bah Lambha Kurbah ki la ong ba ka thong jong kane ka kompani ka dei ban wanrah ka jingkylla ha ka liang ka koit ka khiah, khamtam ban ïarap ïa ki longïing ba duk bad rangli. Ki dawai jong ka Zynmed ki kham duna dor lada nujor bad kiwei, bad kin kynthup ruh ïa ki jait dawai kiba ai jingsumar ïa ki briew bad kumjuh ïa ki mrad.
Ki la pynpaw ruh ba kane ka jingpynbna paidbah (Pre-Launch) ka dei ka lad ban pyntip ïa ki paidbah shwa ban pyllait pura ïa ka jingshakri, khnang ban pynshai ba ka kompani ka don ïa ka jingangnud ban pynbiang dawai dashin ha ka rukom ba kham suk bad ba kyrkieh, khamtam ha ki por ba donkam kumba la bthah da ki doctor.
