Nongpoh, Nailar 08: Ha ka jingbteng ia ki kam shakri paidbah kum uta u nongmihkhmat kaba dei na ka bynta ka jingiabit ia biang lang jong baroh ki nongshong shnong ka Constituency, u MLA ka Mawhati Constituency u Bah Charles Marngar u la leit ban plie ia kawei na ka ïing ba la shna ha jan lum jingtep ka Balang Presbyterian Khliehumstem.
Kane ka kam pynroi ba la shna bad plie paidbah ka dei kaba la pyntreikam da ka Bhoirymbong Community and Rural Development (C&RD) Block ha ka jinglut kaba la kot sha ka Rs. 2 lak na ka bynta jong u snem 2023-2024 bad kane ka jingurlong kane ka kam pynroi kaba dei katkum ka jingdonkam ka Balang ka dei ruh lyngba ka jingkyrshan jong u MLA ka Mawhati u Bah Charles Marngar.
Haba plie ia katei ka ïing kaba long ka jaka shongthaid ne ka jingdonkam ka Balang la don rygnkat ka Dr. R. Tlang, Block Development Officer (BDO) ka Bhoirymbong C&RD Block; u Bah F. Teron, Rangbah shnong ka Khliehumstem, u Rev. D. Ingty, Pastor in-charge ka Balang Presbyterian Khliehumstem, ki dkhot ka Committee bad kiwei kiwei ki nongialam ka Balang.
Ha kane ka juh ka sngi, u MLA ka Mawhati u Bah Charles Marngar u la shim bynta ha ka Women Week Sunday ba la pynlong da ka Jingiaseng Kynthei (Women’s Fellowship) ka Balang Presbyterian Khliehumstem bad ha kane ka sngi u la synñiang ruh da ki Jainsem sha ka kynhun ki Longkmie ka Balang Presbyterian Khliehumstem.
Na ka liang u MLA u Bah Charles Marngar ha kane ka sngi u la ai ka jingkitbok kitrwiang ruh ia ki Longkmie ba kane ka jingrakhe ia ka Women Week Sunday kan long ka khubor ba ki Longkmie kin oh synñiang na ka bynta ka bha ka miat ha ka Balang bad ruh sha ka imlang ka sahlang.
