Nongpoh, Naitung 28: Uwei u Rangbah briew ha ka rta kaba 47 snem bad ba la tip kyrteng kum u Bah E.B Nongshli na ka shnong Umtasor Mawdakhar u la shah rong noh ha ka umsaw, kaba dei hadien ba u la hap kysan najrong jingkieng ha ka wah ïewsier ha Ri Bhoi District.
Kane ka jingjia ka la jia ha ka janmiet jong ka sngi U Blei kata ha ka por 7 baje ei janmiet, ba une u rangbah u dang shongkai bad ki paralok bad kynsan u la hap na jrong jingkieng ha kaba na ka jingheh ka um ha ka wah, ka um ka la rong noh ia u bad ym shym la lap shuh ia u, wat lada ki paralok bad ki nongshong shnong ki la ia wad ia u.
U Rangbah Shnong Umtasor Mawdakhar u Bah R Mukhim, u la pyntip ba ki bor shnong tang mar ia ioh jingtip halor kane ka jingjia, ki la pynlong ia ka jingiawad shnong, hynrei hapdeng ka jingwad shitom kim shym la lap ia une u rangbah ba la shah rong ha ka umsaw ha katei ka wah Iewsier.
U la iathuh ruh ba naduh hynnin ka miet bad wat haduh mynta ka step ruh ki la pyrshang ban ia ngam ha kawei ka wah ban wad ia une u rangbah ba la shah rong ha ka um, hynrei haduh mynta kim shym la lap dien satia kaei kaba la jia ia une u rangbah ba la shah rong ha katei ka umsam hapoh katei ka wah.
Ka Ko0ng Phynai Nongshli, kaba dei shi para ar kmie bad une u Rangbah, ka la iathuh ba utei u Hymmen jongka, u la mih dang step na la ïing da ka jingthmu ban leit peit leit khmih ia ka lyngkha, hynrei ka long pat kaba sngewsih ba ha ka janmiet ki la ioh ia ka khubor kaba sngewsih ba utei u hymmen jongka, u la shah rong noh ha ka umsaw ha katei ka wah kaba don ha Iewsier.
