Nongpoh, Risaw 22: Ka Synjuk ki Rangbah Shnong Ri Bhoi District ha ka jingialam u President u Bah B.B Makdoh bad u General Secretary u Bah P.B Sylliang lem bad kiwei ki nongialam mynta ka sngi ki la pynkup burom ia u Bah Sosthenes Sohtuh MLA bad MDC ka Jirang, kaba dei hadien ba u la ioh ban rung kum uwei u myntri sorkar ha kane ka sorkar kaba u mihkhmat na Ri Bhoi District.

Ia kane ka jingpynkup burom la pynlong ha DRDA Conference Hall Nongpoh, ha kaba nalor u Bah Sosthenes Sohtun kum u nongshah pynkup burom la don lang ruh u MLA ka Nongpoh u Bah Mayral Born Syiem, u President ka RBYF u Bah Bipul Thangkhiew, u President ka KSU North Khasi Hills District u Bah Ferdynald Kharkamni bad kynthup kiwei kiwei ki nongialam bad ki dkhot kane ka synjuk.

Kumba la pynpaw da ki nongialam ka Synjuk ki Rangbah Shnong Ri Bho District, la ong ba kane ka jingpynkup burom ka Synjuk ki Rangbah Shnong ia u Bah Sosthenes Sohtun uba dei u MLA bad MDC ka Jirang, ka dei ka jingsngewsarong ba u myntri rangbah ka jylla u la ai bhah ruh na Ri Bhoi ba un long uwei na u Myntri sorkar ban peit ia ka bha ka miat bad ka roi ka par ha ka jylla bad khamtam eh na ka bynta ka Ri Bhoi District.

Haba kren ruh ha kane ka sngi, na ka liang u Bah Sosthenes Sohtun u la ai ka jingkhublei kaba kyrpang ia ka Synjuk ki Rangbah Shnong Ri Bhoi District, kiba la shim ia kane ka sienjam ym tang ban pynkup burom ia u kum uta u myntrei sorkar, hynrei ka long ruh kum ka jingpynshlur bad ka jingai mynsiem ba u dang lah ban shakhri kham bha bad ban don kata ka jingkitkhlieh na ka bynta ban kyntiew ym tang ia ka Ri Bhoi District bad na ka bynta ki paidbah jong ka jylla hi baroh kawei.

Shuh shuh, u la kular ruh ban dang don kata ka jingiatrei lang ban kyntiew ia ka Ri Bhoi bad ka jylla bad kum u Myntri un shim ia kata ka jingkitkhlieh ryngkat ka jingiatrei lang bad ka sorkar ban wan rah ia kata ka jngkylla bad ka jingkiew shaphrang jong ka jylla ha baroh ki liang.