Nongpoh Risaw 22: Da ka jingiphuh iphieng ka ophis u District Sports Officer, Ri Bhoi District ha ryngkat ka jingiatrei lang ka ophis u Block Development Officer ka Bhoirymbong C&RD Block mynta ka sngi ki la pynhap pyrda noh ia ka lympung ia pyni sap ki khun samla ba la tip kum kata ka “Block Level Chief Minister Youth Engagement Programme 2025” ha kaba ai halor ka phang “Empowered Youth, Empowered Meghalaya”, ba la pynlong ha Auxilium Skills Training Centre ha Khapmara ba hap ha Bhoirymbong C&RD Block.
Kane ka lympung ki samla ka dei ka lympung kaba ar sngi kynthih, ha kaba la wan ban plie da ka BDO ka Bhoirymbong C&RD Block ka Dr. R. Talang ha ka 21 tarik u Risaw 2025 bad mynta ka sngi pat la wan ban pynhap pyrda da u MLA ka Umroi Constituency u Bah Damanbait Lamare kum u kongsan.
La sakhi lang ruh ha kane ka sngi da ka jingdon lang u District Sport Officer ka Ri Bhoi u Bah Bobby L. Nongbet, ka PTI District Sport ka kong Rida Lyndem lem bad kiwei kiwei ki riew rangbah.
Katkum ka thong jong kane ka lympung ki samla ban ai rynsan ha kaba sei madan ia ki sap ki phong, ha kane ka lympung kaba ar sngi la pynlong ia ka jingiakop dro bad ai rong dur, ka jingiakop tem guitar, ka jingiakop rwai, ka jingiakop shad tynrai, ka quiz lem bad kiwei kiwei, ha kaba ki samla don sap ki la ioh shisha ban sei madan ia ki sap ki phong ha kane ka lympung.
Ha kane ka lympung la ioh ruh ban jied haduh 68 ngut ki samla kynthei bad shyrang na Bhoirymbong C&RD Block ba ki hap pat ban mihkhmat sha ka District Level ha kaba pyni ia ki sap kyrpang jongki.
Kum ka jingai mynsiem ia ki samla don sap kiba la ioh rah ai ka jngjop, ka ophis u District Sport Officer ka la sam ruh ia ki khusnam sha ki nongjop bad ryngkat ki syrnot kaba long ka khusnam halor ka jingjop jongki ha ki jingiakop bapher bapher.
Kum ka jingai mynsiem ia ki khun samla katei ka thain, u MLA ka Umroi u Bah Damanbait Lamare u la ai ruh ak jingkhublei kaba kyrpang ia ka ophis u District Sport Officer ka Ri Bhoi bad ia ka ophis ka Block Development Officer ka Bhoirymbong C&RD Block kiba la shim ia kane ka bynta kaba khaw ban ailad ia ki khun samla ban sei madan ia ki sap ki phong lyngba ka jingdon kum kine ki lympung ia pyni sap ki khun samal.
U la kyntu ruh ia ki samla ba kim dei ban pynleh nohei ia ki sap ki phong ba la ai kyrpang da u Blei bad kum ki samla ki dei ban tur shaphrang ha kaba ka sap kaba kyrpang ba la ai da u Blei ka dei ban long ka jingkyrkhu ha ka jngim jong ki.