Nongpoh, Nailar 08: Kum shi bynta ban ban ioh bishar bniah ia ki sap ki phong ki heprit ha ka kam ialehkai phutbol naduh ba ki dang rit ka rta, ka Rumnen Futsal lem bad ka ing ka sem ki la pynlong ia ka lympung ialehkai phutbol ki heprit ba la tip kum ka 1st Baby League bad mynta ka sngi la lah ban pynhap pyrda noh ha ka madan Rumen Futsal kaba don ha ka shnong Mawdiamum.
La wan ruh ban pynhap I akane ka 1st Baby League da u President ka KSU North Khasi Hills District u Samla Ferdynald Kharkamni kum u kongsan bad la sakhi lang ruh da ka jingdon lang u Alberto Nongsiej u trai ka Rumen Futsal, lem bad ki dkhot ka KSU, bad ki kmie ki kpa jong kitei ki heprit kiba la wan ban kyrshan ia la ki khun ha kane ka jingialehkai futsal.
Ia kane ka jingialehkai la phiah ha ki 3 bynta ba kynthup kiba hapoh 8 snem ha kaba ka Narympei Academy ka la pynliem noh ia ka Nongpoh Grassroot, ha ka thup kiba hapoh 10 snem ka rta ka Nongpoh Grassroot ka la pynliem noh ia ka Ha-i-labynta Academy bad ha ka thup ki heprit kiba hapoh ka 12 snem ka rta, ka Narympei Academy ka la pynliem noh ia ka Umsning Grassroot.
Ha kane ka sngi la sam ruh ki khusnam bad ki trophy sha kitei ki kynhun bajop bad ryngkat ka jingkren ai mynsiem na ka liang u President ka KSU North Khasi Hills District u Samla Ferdynald Kharkamni, u ba la kyntu ia ki heprit ban pyndonkam hok ia ki sap ki phong jongki bad kyrmen ba naduh dangrit ki la pynlut por ha kane ka kam ialehkai futsal kin sa mih ruh kita ki khlur ialehkai kiba ai burom ia ka ing ka sem, ka imlang ka sahlang bad na ka bynta ka ri bad ka jaid bynriew.
