Khliehriat, Jymmang 29: Ka Jaintia Students Movement (JSM) hynnin ka sngi ka la mih madan syndon ban rah da ki lama iong bad ki banner ryngkat ki jingthoh ban pyrshah halor ka jingkhang tih dewiong ha rilum Jaintia kaba la ktah shisha ia ka ioh kam ka ioh jam bad ka ioh ka kot ki trai district naduh ba la khang ban tih dewiong ha u snem 2014.

Kane ka jingrah lama iong ki nongialam bad ki dkhot ka JSM ka dei ruh hadien ba ka la tip ba u Myntri rangbah ka jylla u Conrad K. Sangma ryngkat ki myntri sorkar u la wan hiar sha East Jiantia Hills na ka bynta ban plie ia ki kam pynroi bapher bapher bad kane ka jingrah lama iong ka dei beit shi bynta ha kaba iadei bad ka kam dewiong ba ki kwah ba ka sorkar kan pynkylla ia ki kyndon ym tang kita kiba don jaka haduh 100 hectare bad dei ban ailad ruh wat ia kiba don tang 4 hectare ka jaka khnang kito kiba don par dewiong kiba rit ruh kin dup ioh jingmyntoi lang.

Ha kane ka jingrah lama iong, la wan poi ki Magistrate bad ki bor pulit  ryngkat ki bor shnong kiba la kyrpad ban sangeh ia kane ka rah lama iong bad dei hadien ka jingkular ban ailad ban ia kynduh ia u Myntri rangbah ka seng ka la sangeh ban rah lama iong bad ka la ioh lad ruh ban aiti ia ka dorkhas markhmat sha u Myntri rangbah  halor ki mat jingdawa ka seng halor ki kam tih dewiong ha East Jaintia Hills ba dei ban leh lang kumjuh khlem da leh shiliang ia kiba don par dewiong khnang ban kan ai jingmyntoi lang ia ia baroh.

Sa peit ruh