Nongpoh, Nohprah 03:  Ban iasnoh kti lang ha ka pyrthei baroh kawei kum kata ka sngi kyrpang kiba don jingduna ha ka dkhot met, ka ophis ka District Social Welfare officer Nongpoh mynta kas ngi ka la rakhe kyrpang ia kane ka sngi kum kata ka sngi ba al tip international Day of Person with Disabilities ha kaba la ia trei langbad ka Nongpoh Area Women Welfare Association ba la pynlong ha Dorbar Hall Sajer Nongpoh.

Ia kane ka jingrakhe ia ka sngi kyrpang kiba duna dkhot met la wan ban shim bynta da u MLA ka Nongpoh u Bah Mayral Born Syiem kum u kongsan bad la sakhi lang ruh daka jingdonlang u Deputy Commissioner ka Ri Bhoi u Abhilash Baranwal, ka District Social Welfare Officer ka Kong N.F Sun, u Bah S. Pyrbot Manager ka District Resource Centre on Disability Affairs Ri Bhoi bad kynthup ki kmie ki kpa bad kitei kiba don ka jingduna ha ka dkhot met.

Kum ka jingpynphuh pynphieng ia kane ka sngi kyrpang kiba duna dkhot met, la pynlong ruh ia ki jingiakop bapher bapher na ka bynta kito kiba don ka jingduna ha ka dkhot met bad ruh la pynlong ia ka jingai jingsumar ia ki ha katei ka jaka.

Haba kren kum u kongsan, u Bah Mayral Born Syiem u la ai khublei kyrpang ia ka tnad Social Welfare bad ka Nongpoh Area Women Welfare Association kiba la shim khia ban rakhe ia kane ka sngi krypang kiba duna ka dkhot met bad kum kita kiba duna dkhot met ki don ia ka juk ka hok ioh ia kata ka hok ha ka imlang ka sahlang.

U la ong ruh ba kum u MLA u sngewkmen ban iohi ia ki sap ki phong ba kyrpang ba kito kiba don jingduna ha ka dkhot met ruh ki pypaw pyrthei bad kim don satia kata ka jingiapher ha ka long briew ka man briew ha kaba ki don tang kita ki jingpher ha ka dkhot met bad ha ki kam ki jam ki don la ki sap ba la ai da u Blei.

Namarkata, u la kyntu ia kiba haing hasem, ki paidbah bad ki nongialam kim dei ban lehbein ne khein poh ia kito kiba don ka jingduna ha ka dkhot met bad kum kita kiba don ka jingduna ki don ia kajuh ka hok ha ka long briew ka man briew ha ka imlang ka sahlang, u la bynrap.