Naduh ki paidbah nonghsong shnong kynthup kynthei bad shyrang bad ruh ki nongialam seng bhalang ba kynthup ia ka KSU, RBYF bad HYC Ri Bhoi Sepngi, ha ka sngi Palei jong ka taiew, kata ha ka 5 tarik u Naitung 2024, ki la mih ban iaid paidbah da kaba rah lama bad ki banner, ban dawa na ka tnad Forest ka Assam ban pynlait noh ia uwei u rangbah na ka shnong Belahari, ba la shah kem ha ka tnad Forest jong ka sorkar Assam.
Une u rangbah ba la shem ha ki bor pahara ka tnad Forest ka Assam, u dei u Bah Bakstar Diengdoh na ka Shnong Belahari bad u la shah kem ha ka 3 tarik u Naitung, 2024, hadien ba la shah khot sha katei ka tnad treikam ka tnad Forest ka Assam.
Ka daw kaba la pynlong ia ki paidbah bad seng bhalang ban pyrshah, ka dei ruh halor ka Nongrim ka jingshah kem u Bah Bakstar Diengdoh ha ka 10 tarik Jylliew 2024, katba u Bah Bakstar Diengdoh u dang kit ïa ki maw ban pynbha ia ka surok shnong kaba sniew ryngkat ka kali bad hadien katei la pynlait noh bad dei hadien la shah khot samon, kata ha ka 3 tarik u Naitung 2024, ha ka jingleit sha ka tnad treikam ka tnad forest ka Assam ba ki la kem biang noh ia u.
Haba kren ruh ha kane ka sngi, naduh ki nongialam seng bhalang bad ki nongialam shnog ryngkat ki Longkmie, ki la pynpaw ba kim banse ban pynlong ia kane ka jingiaid paidbah, namar ka daw ka long ba ki la shah lehdonbor ha ka tnad Forest ka Assam bad kane ka jingiaid paidbah ka long ruh ban dawa na ka sorkar Assam lyngba ka tnad Forest ba ki dei ban pynlait noh ia utei u rangbah khlem da don kano kano ka jingteh kyndon.
Shuh shuh, kitei ki nongialam bad ki longkmie, ki la kyrpad ruh ia ka sorkar Meghalaya lyngba u myntri rangbah, u Conrad K. Sangma lem bad ki nongmihkhmat ba ki dei ban ia kren noh mardor sha ka sorkar Assam, ban pynlait noh ia u Bah Bakstar Diengdoh, uba la shah kem ha ka tnad Forest jong ka Assam khlem da don kano kano ka jingteh kyndon, namar lada kum kine ki kam shah thombor ki paidbah ka Meghalaya kan dang iai bteng ha ki shnong khappud, kane kan wan rah ia ka kynrum ka kynram, kaba ktah ia ka shongsuk shongsain ki paidbah ka Meghalaya bad Assam ha kitei ki shnong khappud.
