Ka long ka khubor kaba sngewsih ia ki paidbah riewngeit ka Balang Katholik ha Garo Hills bad wat ha ka jylla Meghalaya baroh kawei, ha kaba u Bishop Emeritus George Mamalassery, uba dei uwei na u Bishop, uba la la len lade bad shakri ban aiti lut na ka bynta ka Balang Katholik, u la khlad noh mynta ka sngi ka 5 tarik u Naitung 2024, ha ka rta kaba 92 snem, ha Holy Cross Hospital, Tura.
Haba kren shaphang ka jinglong jingman une u Bishop George Mamalassery, u dei u Bishop uba la len ia lade na ka bynta ban pynkhlain bad wan rah ia ka jingiatylli hapoh ka Balang Roman Katholik bad uba la don bynta ruh ban noh synniang na ka bynta ka bha ka miat ki paidbah ha Tura. U dei ruh u Bishop uba la shakri haduh 28 snem ha Tura, tad haduh ba u la shah khot noh sha la u Nongthaw.
U myntri rangbah ka jylla, u Conrad K Sangma, halor kane ka jingkhlad noh une u Bishop, u la phah ia ka khubor sngewlem bad pynpaw ruh ia ka jingduhnong kaba khraw ym tang ia ki paid riewngeit ka Balang Katholik bad ia ka jylla hi baroh kawei. Ka jingshakri kaba u la aiti na ka bynta ka kam u Blei bad ki synniang, kiba u la noh synniang na ka bynta ka imlang ka sahlang, ka dei kaba ngim nym lah ba klet bad ngin iaid kynmaw shijunom” ong u Conrad K. Sangma.
U la pynpaw ruh ruh ka jingsngewsih kaba khraw halor ka jingduh noh ia une u Bishop bad u phah ruh ka khubor sngewlem sha kiba haïing, ki paralok bad sha baroh ki paid Khristan ka Balang Katholik ha ka jylla.
Kum ban pynpaw paidbah, la kha ia une u Bishop ha Kerala ha u snem 1932 bad u Bishop George Mamalassery, u la duh noh ia ki kmie ki kpa ha ka por ba u dang khynnah. Hapdeng shibun ki jingkynduh mawsiang ha ka jingiaid lynti, u la pynpaw ba u don ruh ia ka mynsiem, ba ka don kata ka jingkhot ba un shakri ia ka kam u Blei bad u la pyndep ia ka jingpule ban long Lyngdoh ba la pynkyntang Lyngdoh ia u ha ka 24 tarik u Iaiong, 1960.
Kum ka jingangnud ka mynsiem ban shakri ia ka kam u Blei bad ia ka imlang ka sahlang, u Bishop Emeritus George Mamalassery, u la ai ka jingshakri sha ki shnong nongkyndong ka Garo Hills bad ha ka jylla Meghalaya. U la don ruh ka bynta kaba khraw ban pynkylla ia ka jingim jong kiba bun ki paidbah ha nongkyndong, da kaba ia don bynta lang bad ki ha ka por ba ki shitom ne ki jynjar kum uta u nongtrei hapoh ka kam ka jong u Blei.
Ka jingtrei bad ka jingshakri kaba khlem da shongthaid ban shakri, ka la pynlong ia u ban shah jied noh kum u Bishop ba nyngkong ha Tura ha u snem 1979, ha ka rta kaba 46 snem bad la shakri ruh kum u Assistant Parish Priest kaTura bad Baghmara kummba shiphew snem ei ei bad u la long ruh kum u Parish Priest ka Dalu ha u snem 1970.
Ha u snem 1971, baka don ka thma Laitluid ka ri Bangladesh, u la don bynta ruh ban ai jaka riehtngen, ai bam bad kyrshan ia ki briew kiba la sakma ha ka Parish kaba u la shakri. Ha ka 8 tarik u Rymphang 1979, ka Holy Cross ka la pynkupbor ia u kum u Bishop ka Tura, kaba u la shakri haduh 46 snem.
Une u Bishop, u la pyniar ruh haduh 14 tylli ki jaka ai jingshakri, bad u la seng ruh 23 tylli ki parish bad u la don bynta ruh ban shakri ia ka kam U Blei bad ruh ba wan rah ia ka Convent, Dispesary, Hostel, ki skul bad u la don bynta ruh ban khot ia ka seng Salesians and Jesuits ban plie ia ka College ha Tura bad Williamnangar.
U Bishop Mamalassery, u la dep ruh ban seng 34 tylli ki Dispensary ha Garo Hills ha ki 5 tylli ki District bad u la dei ruh u nongseng kumba 150 ki jingthiah ha Holy Cross Hospital, Tura ha u snem 1993. U la dei ruh uba la sengi a ka Rino Simonetti School of Nursing ha Tura bad u la khot ruh ia ki Montfort Brothers ba ki seng ia ka Montfort Centre na ka bynta kito kiba don jingduna ha ka dkhot met.
Shuh shuh, kumba u la shongthaid noh ha u snem 2007, u Bishop George, u la bteng ban shakri ia ka Diocese na ka jaka sah jong u, na ka bynta ka kam ka jong u Blei. Ka sorkar Meghalaya ka la pynkup burom ruh ia u da ka Pa Togan Sangma Award. U la shah pynkup burom ruh ia ka kyrdan Doctorate ha u snem 2019 ha University of Science and Technology, Meghalaya (USTM), kaba dei halor ka synniang jong u, na ka bynta ban kyntiew ia ka pule ka puthi, ha ba kyntiew ia ka koit ka khiah bad kumjuh ruh ban wan rah ia ka jingshakri na ka bynta ka bha ka mait jong ka imlang ka sahlang.
