Nongpoh, Jymmang 22: Ka Ri Bhoi Youth Federation (RBYF) Sengkmie mynta ka sngi ka la leit syndon ban ia kynduh ia u Deputy Commissioner ka Ri Bhoi u Abhilash Baranwal na ka bynta ban pynsngew ia ki mat ba la wan rah da ka seng bad ryngka ka dorkhas ba kum u khliehduh ka District un shim khia lem ia kitei ki mat kiba ktah ia ki khun samla ka dong Ri Bhoi.
Ki mat ba la wan rah da ka RBYF hakhmat u Deputy Commissioner ki kynthup ka jingpynshlem ban pynbna ia ka result thungkam jong ka DSC ha ka District, ka jingkyrpad ban phai khmat lem ia ki samla ka District na ka bynta ki contractual post bad kiwei kiwei ki post.
Kawei na ka mat ba kham kongsan ba ka RBYF ka la pynsngew ka dei ban ai shuti ha ka Ri Bhoi Day kata ha ka 4 tarik u Jylliew 2026, kaba dei ka sngi ba ka Ri Bhoi District ka la ioh la ka jong ka District ba pura bad ka jingai shuti ka long shi bynta ban burom ia kane ka sngi kyrpang ha Ri Bhoi District.
Haba ia kren sha ki lad pathai khubor, u Spirit Hinge Employment Secretary ka RBYF u la ong ba ka jingiakynduh ia u DC ka Ri Bhoi ka long kaba pynkmen ia ki nongialam ka RBYF, namar ula kular ban pynlait noh ia ka result ka DSC ha kine ki sngi ba kum ka seng ruh ka shim khia hadien ba bun ki khun samla ki la wan ud sha ka seng RBYF.
U la ong ruh na ka liang u DC u la kular ruh ban shim khia halor ki contractual post bapher bapher ban phai khmat shwa sha ki samla ka District bad kum ka seng ka kyrmen skhem ba kine ki jingkular u DC kin urlong khnang ban myntoi ki khun samla kiba ym don kam don jam hapoh ka District.
Na ka liang u Assistant Secretary ka Education u Bah Rishan Nongtri u la iathuh ba ka seng ruh ka sngewkmen ba u DC u la kular ban shim khia halor ki mad jingdawa ban ai shuti ha ka Ri Bhoi Foundation Day kata man la ka snem ha ka 4 tarik u Jylliew kaba dei ka sngi kyrpang ba ka Ri Bhoi ka la ioh la ka jong ka District bapura. U la kular ruh ban pynbiang ia ki jingtoh jingtar sha ka sorkar ba ka sorkar kan pynbna ia katei ka sngi kum ka sngi shiti ha Ri Bhoi.
SA PEIT RUH
