Nongpoh, Jymmang 22: Kum shi bynta ban kyntiew bad pynkhlaiñ ïa ka jingshakri haka koit khiah ha Ri-Bhoi District, u Deputy Commissioner ka Ri-Bhoi, U Abhilash Baranwal, IAS, mynta ka sngi u la aiti ïa kawei ka kali kit nongpang (Ambulance) sha ka Synjuk Ki Rangbah Shnong Ri-Bhoi District hadien ka jingkyrpad na ka Synjuk ban ïoh jingïarap na ka bor synshar district na ka bynta ban pynsuk ïa ka jingshakri ïa ki nongpang bad ki paidbah ka thaiñ.
Ïa kane ka Ambulance la pynlait paidbah ha Circuit House, Nongpoh, ha ka jingïalang kaba la sakhi da ki nongïalam shnong bad ki riew rangbah na kylleng ka district. Ha kane ka sngi la donlang ruh u Chairman ka Synjuk, u Bah B.B. Makdoh, u Secretary, u Bah P.B. Sylliang, ryngkat bad kiwei pat ki nongïalam shnong kiba la wan ban sakhi ïa kane ka jingïoh jingïarap kaba don bynta ban kyntiew ïa ka koit ka khiah jong ki paidbah.
Sa Pule Ruh | Dawa kiba kyrshan Shree Cement ban pynbiang bor pahara haka Public Hearing
Na ka liang ki nongïalam ka Synjuk Ki Rangbah Shnong Ri-Bhoi District, ki la pynpaw ïa ka jingsngewnguh kaba khraw ïa u Deputy Commissioner bad ïa ka District Administration halor kane ka jingïarap kaba donkam bha ïa ki paidbah ka district. Ki la ong ba kane ka kali kit nongpang kan ai jingïarap shibun ïa kiba donkam jingïarap ha ki por ba kyrkieh bad kan pynsuk ruh ïa ka leit ka wan jong ki nongpang sha ki jaka sumar.
Ka Synjuk ka la kitbok kitrwiang ruh ïa u Abhilash Baranwal, IAS, ha shuwa ba un mih noh na Ri-Bhoi District ban leit shimti ïa ka kam kum u Deputy Commissioner ba thymmai jong ka East Khasi Hills District. Ki la pynpaw ïa ka jingkyrmen ba un dang bteng ban shakri hok bad trei shitom na ka bynta ka bha ka miat jong ki paidbah.
Sa Peit Ruh
