Kum shi bynta ban ieng ha la ki jong ki kjat ha kane ka pyrthei kaba jynjar ban ioh ia ki kam sorkar, ki samla ka thain Nongpoh ki la mih shakhmat ban shim ia sienjam ban seng kam hi, da kaba plie ia kawei ka dukan bam kaba la ai kyrteng kum ka Aroma Restaurant bad ka dukan ban sumar bad ai dawai ia ki mrad ia kaba la ai kyrteng kum ka Bhoi Veterinary Clinic.
Ia katei ka Aroma Restaurant kaba don harud jong ka surokbah National Highway 6 la seng da u samla Peter Syiem lem bad u samla Aaron Reginald Ingti ha Downgate, Nongpoh katba ia katei ka Bhoi Veterinary Clinic, la seng da u Dr Esra Syiem harud jong ka surokbah National Highway 6 hajan ka Ri Bhoi College ha Pahamsohthri.
Ia kitei ki ar tylli ki dukan la leit ban plie ban plie paidbah da u MLA ka Nongpoh konstitwensi, u Bah Mayralborn Syiem ha ka jingiadon ryngkat jong nongialam niam ba kynthup naduh u Pastor Jerermy O. Khanglam, Pastor Robert Terang, u Pastor K Rapsang, Pastor Garfield Sangma nalor ki bahaing hasem bad kiba ieid ba thoin jong kitei ki samla kiba la seng ia kitei ki dukan.
Na ka liang jong u Bah Mayralborn Syiem haba ai kren ha kitei ki ar tylli ki jingplie paidbah ia kitei ki dukan, u la ai ka jingiaroh sha kitei ki samla kiba la mih shakhmat ban sdang ieng hala ki jong ki kjat ban pynbit pynbiang ia ki jingdonkam jong ka ing ka sem.
U la ong ruh ha kane ka juk kaba mynta, ka long kaba eh ia ka sorkar ban aikam lut ia baroh, kumta ki samla ki donkam ban thawlad thaw lynti ban sengkam ym tang ialade, hynrei wat ban aikam ruh ia kiwei pat ki samla khlem kam. U la ong ruh ba ha kano kano ka kam, ka jingeh kan don beit, hynrei lyngba ka jingtrei shitom bad trei minot thop ryngkat bad ka jingduwai ia U Blei, u kyrmen baroh ki jingthmu kin iaid beit iaid ryntih kumba kitei ki samla bad ki bahaing hasem ki jongki, ki angnud.
