Jowai, Jylliew 26: Haba kut noh ka District Level Inter-School Subroto Cup Football Tournament jong ka West Jaintia Hills District ha Jowai, ba la pynlong ha madan Kiang Nongbah Stadium, ka skul North Liberty Higher Secondary School na Jowai, ka la ioh ban khur ia ka nam lahduh ha ka U-17 jong ki shynrang bad kynthei, katba ha ka U-15 jong ki shynrang la rah da ka Dominic English Upper Primary School, Namdong.
Haba phai sha ka jingiakhun ha ka U-15 jong ki shynrang, ka Dominic English Upper Primary School na Namdong, ka la ioh ban khur ia ka namlahduh, hadien ba ka la lah ban pynliem noh pyrshah ia ka St’ Dominic Higher Secondary School Mowkyndeng da 1-0 bad ia ka kol la thep da u Aibor Wahlang ha ka minit ba 7 jong ka jingiakhun.
Katba ha ka U-17 jong ki kynthei, ka North Liberty HSS, ka la ioh ban khur ia ka nam lahduh hadien ba ka la lah ban pymliem kput ia ka Kiang Nangbah Govt HSS da kaba thep haduh 7-0. Ha katei ka jingiakhun phainal, ka Deigratia Dan ka la ioh ban khur ia ka Hat-trick, kaba la ioh ban thep lai kol, ka Peacefully Pohplet ka la ioh ban thep ar kol, ka Alisha Pyrtuh shi kol bad ka Eiladki Ksoo shi kol.
Ha ka U-17 jong ki shynrang, ka North Liberty HSS ka la jop pyrshah ia ka Govt Boys HSS Jowai da 2-0 bad ia kitei ki kol la thep da u J Nial Rasmut bad u Rio Marboh.
Lyngba katei ka namjop, ka North Liberty HSS ha ka U-17 ki shynrang bad kynthei, kumjuh ruh ka Dominic English UPS, kin leit ban mihkhmat na West Jaintia Hills District sha ka jingiakhun ha ka State Level Inter-School Subroto Cup Football Tournament 2024 kaban sa long shen ha ka nongbah Shillong.
